Hamarkada: 2010

  • 2019-5-27. EH Bilduk gehiengo osoa berretsi zuen udal hauteskundeetan, Nagore Alkorta zerrendaburu berriarekin. Koalizioak botoen %57,11 lortu zituen (4.489 boto). EAJk, berriz, bozen %38,49 jaso zituen; 3.025 boto. Bi alderdi horien ordezkariekin osatuko zuten 2019-2023 agintaldiko udalbatza.
  • 2019-5-20. Urrestillako langile bat hil zen Aizarnan, pinudi batean lanean ari zela.
  • 2019-4-30. Aske utzi zuten Joseba Segurola 'Xegu' presoa, Madrilen. 2005ean ETAko kide izatea leporatuta atxilotu zuten Frantzian. Hango hainbat espetxetan preso egon ondoren, Euroagindu bat tarteko Madrilera eraman eta hango Auzitegi Nazionalak baldintzarik gabe aske uztea erabaki zuen.
  • 2019-4-28. Añares Rioja ISB taldea saskibaloiko emakumeen Espainiako maila gorenera igotzeko atarian gelditu zen, Kanariar Uharteetan jokatutako igoera faseko hiru partidetatik bi galduta.
  • 2019-4-28. EAJk irabazi zituen Espainiako Kongresurako hauteskundeak Azpeitian.
  • 2019-4-17. Done Jakue kaleko apaizetxea botatzen hasi ziren, haren tokian udal sustapeneko etxebizitzak eraikitzeko.
  • 2019-4-15. Haizeteak kalteak eragin zituen kiroldegiko sabaian.
  • 2019-4-14. Marc Buadesek (Telcom Gimex) irabazi zuen txirrindularien Urrakiko XLIX. Igoera.
  • 2019-4-12. Jendetzak egin zion harrera herrian 21. Korrikari.
  • 2019-3-31. 'Nuarbe, 29 urteko soka' liburu aurkeztu zuten. Nuarbeko sokatira taldearen 29 urteko ibilia jasotzen duen lana Laxaro Azkunek idatzi eta Azpeitiko Udalak eta Nuarbeko sokatira taldeak argitaratu zuten.
  • 2019-3-30. Zuzenbide Piriniarraren II. Jardunaldia egin zuten Basazabal jauregian.
  • 2019-3-30. Bayelign Teshager Yegzaw eta Irene Kimais nagusitu ziren 26. Azkoitia-Azpeitia maratoi erdian. Ordubeteko atzerapenarekin hasi zen proba, Azkoitian izandako sute baten ondorioz.
  • 2019-3-25. Done Jakue kaleko Iturri Txiki ondoko eraikin zaharren eraistea bukatu zuten.
  • 2019-3-24. Alaia Juaristik 16 urtez azpikoen Iraupen Eskiko Espainiako Txapelketa irabazi zuen. Guztira, urrezko domina bat eta zilarrezko bi lortu zituen azpeitiarrak Candanchun (Huesca, Aragoi, Espainia).
  • 2019-3-22. Haur parke berria ireki zuten Iraurgi Ikastetxearen Betharrameko eraikineko jolastokian.
  • 2019-3-17. Azpeitiko zezen plazan hogei kanaerdiko ebaki, Hernio igo eta jaitsi, eta Tolosako zezen plazan beste hogei kanaerdiko ebaki zituen Xabier Orbegozo 'Arria V'.a errezildarrak. Lan guztiak bost ordu eta hamar minutuko denboraren azpitik osatzea zuen erronka eta bete egin zuen, lau ordu 49 minutu eta 35 segundoko marka eginda.
  • 2019-3-2. Iñaki Etxarte ETAko preso, deportatu eta iheslari ohia Azpeitira itzuli zen.
  • 2019-2-28. 'Disoluzio agiriak' poesia liburua plazaratu zuen Jose Luis Otamendik.
  • 2019-2-26. 'Azpeitia 1936-1945' eta 'Azpeitia 1960-2017' liburuetako edukia eguneratu eta sarean jarri zuten Azpeitiko Udalak eta Aranzadi zientzia elkarteak.
  • 2019-2-13. Esklabak-Iturzulo eremuan babestutako beste 67 etxebizitza eraikiko zituztela iragarri zuen udalak.
  • 2019-2-8. Alaitz Badiolak Emakumea Pilotari Txapelketaren Bigarren Mailako txapela jantzi zuen Zestoan. Usue Zubizarretarekin bikotea osatuta, 22-14 irabazi zuen Ane Arteagaren eta Naroa Agirreren kontrako finala.
  • 2019-2-3. 20 urtez azpiko emakumezkoen Euskadiko Kros Txapelketa irabazi zuen Xeye atletismo taldeak.
  • 2019-2-1. Gurutz Ansola politikaria hil zen, 94 urterekin, Donostian. Eusko legebiltzarkide izan zen 1980 eta 1987 urteen artean, Gipuzkoako Batzar Nagusietako presidente 1987-1991 urteen artean, eta Gipuzkoako Ikastolen Federazioko lehenengo presidentea ere izan zen azpeitiarra.
  • 2019-1-25. Basazabal jauregi zaharberritua inauguratu zuten, beheko solairuan turismo bulegoa eta goikoetan erabilera anitzeko gelak prestatuta.
  • 2019-1-24. 'Pumori, mendiaren alaba' dokumentala estreinatu zuten Soreasu antzokian. 2001ean Pumori mendian hildako Beñat Arrue azpeitiarra, Iñaki Aiertza aizarnazabaldarra, eta Aritz Artieda, Javier Arkauz eta Cesar Nieto nafarrak omentzeko eta Suku Mayaren istorioa kontatzeko egin zuten ikus-entzunezkoa, Alex Txikonen ekimenez.
  • 2019-1-20. Arauntza taldea 50. aldiz irten zen San Sebastian bezperako helduen danborradan eta zegokion omenaldia jaso zuen udaletxean.
  • 2019-1-20. Dioni eta Iñigo Perez anaiek, parrokiako naximentuaren arduradunek, udalaren omenaldia jaso zuten San Sebastian eguneko umeen danborradaren ospakizunen barruan.
  • 2019-1-12. Aitor Zubillagak zilarrezko domina irabazi zuen Gipuzkoako pista estaliko atletismo txapelketaren 60 metroko lasterketan.
  • 2019-1-9. Hegazkin arin bat erori eta bertan zihoazen bi lagunak hil ziren Hernio mendian. Cascaistik (Portugal) Hondarribiara zihoan abioia eta britainiarrak ziren hildakoak.
  • 2018-12-15. Jon Alberdi pilotariak eta Maider Etxezabal sokatiralariak jaso zituzten 2018ko Azpeitiko kirolaririk onenen saria. Boluntario onenaren saria, berriz, Egoitz Arrutirentzat izan zen.
  • 2018-12-6. Xake Produkzioak taldearen 'Lur' antzezlanak, Erika Olaizola aktore azpeitiarrarekin, irabazi zuen XXXVI. Euskal Antzerki Topaketetako Ikusleen Saria.
  • 2018-11-7. Joxe Mari Iriondoren ibilbide profesionala saritu zuten Euskal Kazetaritza Sarietan.
  • 2018-10-27. Imanol Eliasek idatzitako 'Matxinada' antzerki musikala taularatu zuten herriko ehun lagun inguruk Soreasun. Azpeitiko Kultur Mahaiaren ekimenez ondutako ikuskizunarekin hasi ziren 2018ko Euskal Antzerki Topaketak.
  • 2018-10-19. Iraurgi Ikastetxeak Jose Artetxe kaleko eraikin berritua inauguratu zuen.
  • 2018-10-15. Erabat kiskali zuen suak Egurtza Azpiko baserria.
  • 2018-10-10. Iñaki Errazkinen eta Ainhoa Intxaurrandietaren aldeko ebazpena eman zuen Espainiako Kontu Auzitegiak, GHK-ren zuzendaritzak bien aurka jarritako salaketa atzera botata.
  • 2018-10-7. Xanti Rodriguezen 'Lekaime' film laburra estreinatu zuten Sitgeseko Fantasiazko Nazioarteko Zinema Jaialdian.
  • 2018-10-7. Xiriako Gurrutxagari eskainitako eskultura jarri zuten Nuarbeko frontoian, Juan Mari Etxeberriak egina.
  • 2018-10-4. 'Ispiluak eta itsasoak' eleberria kaleratu zuen Joxean Agirrek.
  • 2018-9-29. 28 urte eta gero berreskuratutako Euskal Pentatloi Txapelketa jokatu zen zezen plazan. Xabier Zaldua zumarragarrak irabazi zuen.
  • 2018-9-29. Asier Larruzeak eta Maud Conbarieuk irabazi zuten X. Zuzenien mendi lasterketa bertikala.
  • 2018-9-28. Profesionaletan debuta egin zuen Jon Alberdi pilotariak etxean, Izarraitz frontoian. Jon Ander Albisurekin bikotea osatuta, 22-19 galdu zuen Baiko enpresako aurrelari azpeitiarrak Oinatz Bengoetxearen eta Alvaro Untoriaren aurka.
  • 2018-9-26. Javier Otaegi 'Beixama' pilotari ohia hil zen.
  • 2018-9-14. 'Ametsen harria', Azpeitia-AnnapurnaII 1986 espedizioaren memoria berreskuratzea helburu zuen ikus-entzunezkoa, aurkeztu zuten Soreasu antzokian.
  • 2018-7-30. Izarraitz taldeko txistulariek eta Euskaraldiko ordezkariek bota zuten saninazioetako txupinazoa.
  • 2018-7-25. Mendaroko Agarre haitzuloan aurkitutako Madeleine aldiko bi piezaren eta labar arte baten berri eman zuten Azpeitiko Antxieta jakintza taldeko eta Aranzadi zientzia elkarteko kideek.
  • 2018-7-24. Amets Amubietak eta Larraitz Larrañagak Gipuzkoako Dantza Suelto Txapelketa irabazi zuten Errenterian.
  • 2018-7-22. Azpeitiak Euskal Herriko eskuzko Herriartekoaren txapela jantzi zuen, bigarren urtez jarraian, Amurriori 3 eta 0 irabazita. Zornotzan jokatu zuten finala.
  • 2018-7-21. Euskaltzaindiak euskaltzain urgazle izendatu zuen Xabier Euzkitze.
  • 2018-7-10. Lau urterako lan hitzarmena sinatuta, hamabi eguneko greba bertan behera utzi zuten Sammic enpresako langileek.
  • 2018-7-4. 'Azpeitia 1960-2017. Motibazio politikoz urratu diren giza eskubideak eta beste sufrimendu batzuk, Azpeitian eta azpeitiarrei gertatuak' liburua aurkeztu zuten udaletxean.
  • 2018-6-30. Azpeitiak esku pilotako Gipuzkoako Herriarteko Txapelketa irabazi zuen, Ataun 2 eta 1 mendean hartuta, Donostiako Atano III.a frontoian. Zazpigarren txapela Ilunpe elkarteko pilotarientzat, laugarrenna jarraian.
  • 2018-6-30. Joseba Albizu txirrindulariak bigarren urtez jarraian irabazi zuen Europako Ultramaratoi Txapelketa, Vielhan (Aran bailara, Okzitania).
  • 2018-6-28. Azoka Herritik egitasmoak amaitutzat eman zuen bere ibilbidea.
  • 2018-6-24. Azpeitiak 2 eta 1 galdu zuen Gipuzkoako Herriarteko I. Gomazko Paleta Txapelketaren finala Donostiaren kontra, Donostiako Altzan.
  • 2018-6-22. Lehen Euskaraldirako Azpeitiko bi hamaikakoak aurkeztu zituzten.
  • 2018-6-21. Grebari ekin zioten Sammic enpresako langileek, "hitzarmen duin baten alde".
  • 2018-6-19. Pako Aristik 'Maitatu zure egunak' poesia liburua aurkeztu zuen.
  • 2018-6-19. Iñaki Urangak irabazi zuen XXXVI. Euskal Antzerki Topaketen kartel lehiaketa.
  • 2018-6-16. Aitor Mimenzak eta Alazne Iruretak irabazi zuten Urrestillako San Juan Herri Krosa.
  • 2018-6-10. Siriako ehun bat errefuxiatu Loiolan izan ziren, Jesusen Lagundiko Migratzaileen Laguntzarako Zerbitzuak, Alboan gobernuz kanpoko erakundeak eta Europan bizi diren hainbat errefuxiatu siriar batzen dituen Go Forward Europe taldeak antolatutako Hospitalitatearen Bideak egitasmoaren lehen edizioaren barruan. Erakundeetako ordezkaritza zabalk egin zien harrera, Iñigo Urkullu Eusko Jaurlaritzaren lehendakaria buru zutela.
  • 2018-6-1. 81 urteko gizon bat hil zen Matxinbentan, traktore batekin istripua izanda.
  • 2018-5-30. Esklabetako eraikinaren atzean 129 etxebizitza babestu eta tasatu eraikitzeko proiektua iragarri zuen Azpeitiko Udalak.
  • 2018-5-27. Basilio Urbistondo gudari urrestildarra hil zen, 100 urterekin.
  • 2018-5-23. Mikel Zabaltza eta Alberto Fernandez mendizaleen Drangnag-rirako espedizioak jaso zuen Joxe Takolo Beka.
  • 2018-5-20. Gipuzkoako Pilota Eguna ospatu zuten lehen aldiz Azpeitian eta ospakizun horren barruan ireki zituen berriro ateak Izarraitz pilotaleku eraberrituak.
  • 2018-5-6. Lizarte taldeko Ivan Morenok irabazi zuen Txirrindularitzako XLVIII. Urrakiko Igoera .
  • 2018-4-29. Walter Becerrak eta Oihana Azkorbebeitiak irabazi zuten Azpeitian hasi eta Azkoitian bukatu zen XIV. Izarraizko mendi lasterketa.
  • 2018-4-27. Denboraldi bat Espainiako Urrezko LEB Ligan aritu ostean, Zilarrezko LEBera jaitsi zen Sammic ISB saskibaloi taldea.
  • 2018-4-21. Aingeru Castrok eta Alaitz Urkiolak irabazi zuten Azpeitiko Rallysprinta, laugarren urtez jarraian.
  • 2018-4-12. Madrilgo Kontu Auzitegian epaitu zituzten Iñaki Errazkin azpeitiarra eta Ainhoa Intxaurrandieta (Ingurumen diputatu eta Gipuzkoako Hondakinen Kontsortzioko lehendakari ohiak, hurrenez hurren), Zubietako erraustegiaren proiektua geldiarazteak eragindako kalte ekonomikoa Errazkinek eta Intxaurrandietak beren gain hartzea nahi zuten GHK-ren garaiko arduradun politikoek, 40 milioi euro baino gehiagoko zigorra ordainduz.
  • 2018-4-9. Eraikin berritua inauguratuta, Betharrameko eraikinean eskolak ematen hasi zen berriro Iraurgi Ikastetxea.
  • 2018-3-24. Mark Kiptook eta Hawi Megersak irabazi zuten Azkoitia-Azpeitia maratoi erdiaren 25. edizioa.
  • 2018-3-19. Aitor Zulaika futbol entrenatzaile azpeitiarrak Reala B taldearen gidaritza hartu zuen.
  • 2018-3-17. Europako Giza Eskubideen Auzitegiak ateak itxi zizkion Pasaiako segadaren auziari, Azpeitiko Udalak eta segadan hildakoen senideek jarritako helegiteak atzera botata.
  • 2018-3-16. Haritz Mujika asteasuarrak irabazi zuen IX. Erniarraitz Bertso Txapelketa, Gaztetxean jokatutako finalean.
  • 2018-3-16. Iker Bueno Gipuzkoako Saskibaloi Federazioko kirol arduradun izendatu zuten.
  • 2018-3-15. Antxieta Arkeologi Taldeak Soreasuko bere egoitza berria inauguratu zuen.
  • 2018-3-9. Josu Urbieta 'Pou' azpeitiarra Poitiers-Vivonneko presondegitik (Frantzia) Mont de Marsangora (Frantzia) aldatu zutela jakinarazi zuen Etxerat elkarteak.
  • 2018-3-4. Xabier Aranburu 'Guzta' Urrestillako bizilagunak Urrezko Harri-jasotze Txapelketa irabazi zuen, Izarraitz pilotalekuan jokatutako finalean.
  • 2018-2-28. Roman Azkuek irabazi zuen Sokamuturra 2018 argazki lehiaketa. Iñaki Joaristi 'Altzarte' saria, berriz, Iñaki Aranbururentzat izan zen.
  • 2018-2-21. Olatz Prat izendatu zuen lehendakari Azpeitiko Kultur Mahaiak. Maite Maizen lekukoa hartu zuen Pratek.
  • 2018-2-15. Esklabetako komentuaren eraikinean bereziki gazteei bideratutako alokairu sozialeko 45 etxebizitza eraikitzeko akordioa sinatu zuen Udalak Eusko Jaurlaritzarekin.
  • 2018-2-10. Europako Giza Eskubideen Auzitegian helegitea aurkeztu zutela jakinarazi zuten Pasaiako segadan hildakoen senideek.
  • 2018-2-3. Elikagunea denda ireki eta Azoka Plaza berritua inauguratu zuten.
  • 2018-2-2. Absolbitu egin zituzten 2015eko maiatzean Espainiako Auzitegi Nazionalean izan zen epaiketa batean desordena publikoa eragitea eragotzita epaitutako Azpeitiko bi bizilagunak.
  • 2018-1-31. Mikel Larrañagak Urrezko Aizkolari Koparen finala irabazi zuen, Asteasun.
  • 2018-1-27. Sokamuturraren 500. urteurrena ospatzeko ekitaldi nagusia egin zuten Soreasu antzokian. Bertan estreinatu zuten 'Irteera', Xanti Rodriguezek Jai Karnabaleko zezenaren irteeran oinarrituta egindako film laburra.
  • 2018-1-27. Natul euskara elkarteak, Uztarria Komunikazio Taldeak eta Udalak 'Azpeitiarrez Natul' aurkeztu zuten Sanagustin kulturgunean, herritarrek egindako ekarpenekin Azpeitiko hizkeraren hainbat esapide jasotzen dituen liburuxka.
  • 2018-1-20. Iker Aizpuruk zilarrezko domina irabazi zuen infantil mailan Igeriketa Egokituko Espainiako Txapelketan.
  • 2018-1-19. Arrantzaleak taldeak 50. urteurrena bete zuen helduen danborradan. 1981ean taldearekin danborra jotzen atera ziren lehen emakumeak igo ziren udaletxera omenaldia eta oroigarria jasotzera.
  • 2018-1-13. 'Sokamuturra Argazki Lehiaketa' liburua aurkeztu zuen Azpeitiko Argazki Elkarteak Sanagustin kulturgunean, sokamuturraren 500. urteurrenaren bueltako egitarauaren barruan
  • 2017-12-31. Hilda aurkitu zuten Pirinioetan Iñigo Larrañaga 24 urteko gazte azpeitiarra. Bezperatik ari ziren haren bila La Mongie (Frantzia) eski estazioaren inguruetan, eskiatzen ari zela desagertu ondoren.
  • 2017-12-31. Aitor Mimenzak eta Maite Etxezarretak irabazi zuten San Silbestre lasterketa.
  • 2017-12-31. Mikel Larrañagak Urrezko Aizkolari Kopa irabazi zuen, Asteasun jokatutako finalean.
  • 2017-12-30. Joxean Etxeberria zigarrak eta Xabier Zaldua zumarragarrak aizkora eta korrika uztartutako apustua jokatu zuten zezen plazan. Aise nagusitu zen Etxeberria.
  • 2017-12-30. Mikel Orbeak Euskadiko Ziklokros Txapelketa irabazi zuen, junior mailan.
  • 2017-12-27. Iraurgi Saskibaloi Taldeak oroigarria jaso zuen kirol kazetarien Gipuzkoako Kirolari Onenaren ekitaldian.
  • 2017-12-20. Ederti dekorazio dendak irabazi zuen VI. Erakusleiho Lehiaketa.
  • 2017-12-20. Ignaziotar Lurraldea turismo sustapenerako eta dinamizaziorako proiektuak Europako lekuen bikaintasuna saritzen duen EDEN sarietako bat lortu zuen.

Imanol Eliasek 2003ko abenduan aurkeztu zuen Azpeitiko Efemerideak liburua. Geroztik, Uztarria Komunikazio Taldeak hartu du efemerideen datu-basea osatzeko ardura. Efemeride guztiak, hemen dituzue kontsultagai. Informazio gehiago

Bilaketa efemerideetan