Eguna: 11-20

  • 2009-11-20. Imanol Eliasek Txalo Saria jaso zuen.
  • 2007-11-20. Juan Antxieta Musika Eskolaren 25. urteurreneko liburua aurkeztu zuten udaletxean.
  • 2004-11-20. Imanol Eliasek 'Azpeitia, 500... (azpeitiarrak eta herriarekin bat eginak)' liburua aurkeztu zuen udaletxean.
  • 1964-11-20. Anai Maristentzat Ikastetxe berria egiteko proposamenak aurkeztuta ziren hilaren 10ean, eta langintza Ramon Abaunzi ematea erabaki zuten, hura zelako proposamena aurkeztu zuen bakarra.
  • 1964-11-20. Udalak aho batez erabaki zuen Angel Iglesiasekin tratua egitea telebista erremisorea jartzeko Oñatzen. 206.024,30 pezeta ordaindu zizkion.
  • 1911-11-20. Joxe Antonio Odriozolak aurkeztu zuen txostenean zioen arku batzuen bidez Ibaiederren zati bat estaltzeko baimena eskatu zuela. Proiektua aztertu ondoren, Udalak egokitzat hartu zuen, Zelai Luze eta Zelai Txiki inguruari mesede handia egingo baitzion.
  • 1856-11-20. Felix Ortiz eta San Pelayo jaio zen herrian, Dionisio Ortiz Nafarroako Zuñigakoa eta Antonia San Pelayo Burgosko Orrantiakoaren semea.
  • 1820-11-20. Elosiaga eta Araz auzoetako biztanleek txosten bat egin zuten, eta zioten ez zutela gogoko Urrestilla Azpeitiko herritik banatzea, ez zuelako gauza hoberik sortuko eta bai lehen zena ezerezean utzi. Txostena politiko nagusiari bidaltzea erabaki zuten.
  • 1820-11-20. Herriko Miserikordiari buruz probintziak idatzitako gutuna kontuan izanik, herriak erantzun egin zion, urriaren 6an idatzitakoan egindako galdera jakin nahirik: herriratu beharko zuten behartsuen gastuak nork ordaindu behar zituen, herriak edo probintziak, eta barkatzeko eskatuz gaizki ulertu bazen. Probintziaren aldetik ontzat harturik zenez, herriek euren Miserikordia izatea erabaki zuten, Azpeitikoak ere horrela jarraituko zuela, eta 70 edo 80 behartsu gehiagorentzat tokia prestatuko zuela, betiere behartsu bakoitzeko probintziak 50.000 erreal aurreratzen bazituen.
  • 1814-11-20. Bezperan Diputazioak idatzitako gutunaren berri eman zuten: herrian zen tropari hornikuntza egiteko Bidania, Goiaz, Albiztur, Antzuola eta Ezkioga herriek lagunduko zuten. Berehala idatziak bidaltzea onartu zuten, eta Azpeitian egingo zen bilerarako ordezkari bat izendatzea eskatu zuten. Hor erabakiko zen bakoitzak egin beharko zuena.
  • 1814-11-20. Utzitako haur bat aurkitu zuten gauez, Urrestillarako bidean, Aginagaetxe inguruan.
  • 1811-11-20. Kontuan izanik herrian zegoen troparen hornikuntza eta herrian gotorlekuak egiten ibili ziren langileei herriak emandakoa, unean Donostian zeuden Joxe Manuel Enparan eta Felipe Neri Etxaleku herritarrei idaztea erabaki zuten, gaiari buruz gestioak egiteko eskatuz.
  • 1811-11-20. Azkoitiko, Zestoako eta Errezilgo alkateei hurrengo eguneko goizeko zortzietarako deitzea erabaki zuten, denen artean ikusteko herrietan alerik zen edo ez, militarrak hasi ez zitezen etxeak miatzen.
  • 1783-11-20. Madrilgo gortean zen Pedro Etxanizi, herriaren izenean Gaztelako Kontseilu Nagusiari eskaera aurkezteko ahalmena ematea erabaki zuten, San Millango markesak Enparan eta Soreasu errotetan zituen zatiak eskuratzeko -20.000 erreal osatzen zituzten guztira- eta herriarentzat baimena lor zezan Saño eta Enparan-saroe basoak saltzeko.
  • 1475-11-20. Herrian ziren hiru labarik egurra euren labeentzako izatea eskatu zuten, eta Udalak erabaki zuen bakoitzari hamabi gurdi egur ematea, baina aurrez baso zaindariak seinalaturik.
  • 1470-11-20. Enrique IV.ak baimena eman zuen Bidaniko Usarragan egiten ziren Gipuzkoako Batzar bereziak bertako San Bartolome elizan egiteko, eta Basarten ospatzen zirenak Azkoitiko Santa Krutz monastegian edo Azpeitiko Olazko Andre Mariaren ermitan egiteko.

Imanol Eliasek 2003ko abenduan aurkeztu zuen Azpeitiko Efemerideak liburua. Geroztik, Uztarria Komunikazio Taldeak hartu du efemerideen datu-basea osatzeko ardura. Efemeride guztiak, hemen dituzue kontsultagai. Informazio gehiago

Bilaketa efemerideetan