'1766ko matxinada' izena jarriko diote Bustinzuriko Errebaleko ibai aldeko kaleari

Uztarria.eus | Udala
2016ko mai. 4a, 18:08

Azpeitiko Kultur Mahaiak egindako proposamena aho batez onartu zuten atzo, asteartea, maiatzeko ohiko udalbatzarrean. Bi mozio ere onartu zituzten: Diru-sarrerak Bermatzeko Laguntza (DBL) mantentzearen aldekoa, EH Bilduren aldeko eta EAJren kontrako botoekin; eta Europako Batasunak eta Turkiak errefuxiatuak kanporatzeko egindako akordioaren kontrakoa, aho batez.

'1766ko matxinada' izena hartuko duen kalea. (AZPEITIKO UDALA)  Ikusi haundiago | Argazki originala

Aspaldiko kale batek izen berria izango du aurrerantzean Azpeitian. Arana kalea eta Artzubia Urola ibaiaren ondotik elkartzen dituen kaleak ez zuen, orain arte, izen jakinik, baina aurrerantzean izango du: 1766ko matxinada kalea izango da, orain dela 250 urte gertatutakoak gogoan. Atzo, asteartea, aho batez onartu zuten kale horren izendatzea maiatzeko ohiko udalbatzarrean, Azpeitiko Kultur Mahaiak egindakon proposamenari oniritzia emanez.

"Injustizia bati justizia egin" nahi izan du erabakiarekin Azpeitiko Udalak. Matxinadaren memoria berrekuratuz, "gure historiaren zati bat, galtzaileen borroka" gogora ekarri nahi dutela esan zuen Eneko Etxeberria alkateak. Garaiko jauntxoen erabakien kontra altxatu ziren matxinoak "eredu bat" direla uste du alkateak, eta ordukoaz "asko ikasteko" dugula. "Haien izenak ez daude jasota, baina data jasotzea proposatzen da" kale bati matxinadaren izena emanda.

Jose Luis Otamendi idazle, Kultur Mahaiko kide eta Sanagustin Kooperatibako lehendakariak ere hartu zuen hitza, kalearen izendapen berriaren harira. "Oso pozik" azaldu zen Otamendi kale bati 1766ko matxinada izena ematea erabaki dutelako. "Injustizia handi baten ordaina da", harentzat. 250 urtez "ahotsik gabe gelditu" zirenen memoria jasotzea dela nabarmendu zuen, besteak beste. Gogora ekarri zuen, halaber, Errebaleko jendeak kale horri "atzekaldea" deitu izan diola; "bazterrekoak oroitzeko ez da toki txarra", esan zuen.

Joan den apirilaren 14an bete zen Azpeitian eta Azkoitian piztu zen Gariaren Matxinadaren 250. urteurrena eta egun berean aurkeztu zuten Azpeitiko Kultur Mahaiak, Azpeitiko Udalak eta Azkoitiko Maxixatzen Euskara Elkarteak urteurrena oroitzeko urte osorako prestatu duten egitaraua. Oraindik zehaztu gabe dagoen arren, Udalak aurreratu du kale-izen berria ofizialki aurkezteko egingo dutela ekitaldiren bat.

Mozioak

Bi mozio ere onartu zituzten maiatzeko plenoan: Diru-sarrerak Bermatzeko Laguntza (DBL, AGI gaztelaniaz) mantentzearen aldekoa eta Europako Batasunak eta Turkiak errefuxiatuak kanporatzeko egindako akordioaren kontrakoa.

DBL-a mantentzearen aldeko mozioa EH Bilduk aurkeztu zuen eta koalizioko ordezkarien aldeko eta EAJren kontrako botoekin onartu zuten. Jeltzaleek gai beraren gaineko kontramozioa aurkeztu zuten eta hura ere bozkatu zuten udalbatzarrean; kasu horretan, EAJk alde eta EH Bilduk kontra bozkatu zutenez, gehiengoa duen koalizioaren ezezkoarekin atzera bota zuten mozioa.

Bigarren mozioa Europako Batasunak eta Turkiak errefuxiatuak kanporatzeko egindako akordioaren kontrakoa izan zen eta, aurrekoa ez bezala, aho batez onartu zuten bi talde politikoetako zinegotziek.

Bidali:  

Erantzunak

INIXI29 | 2016-05-05 : 14:21

Errebala txikitatik, nere jolastoki izan zena, oso ondo ezagutzen dut, eta Jose Luis Otamendiri argitu nahi nioke, "atzekoaldeta" deitzen zitzaiola, Errebaleko (karnizeria, Pikua, garai bateko Arrona taberna, Txoko t.a.)atzekoaldetik zeharkatzen zuen bide estu bati deitzen zitzaiola.
Orain izen eman zaion inguru horretatik, ez zegon oinezkoen pasabiderik,bakarrik txoko taberna ingurutik Urola ibaira jeixteko bidea.
Eta kale izenekin ari garela, zergaitik ez da berreskuratzen ,Buztinzuriko Plazatxoa, orain Olazko Andre Mari plaza bezela ezagutzen dena?. Jakin berri dut, azken izen hau Frankismo garain
ipinitakoa dela, Zer iruditzen?

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu