Azken urteetako dinamika onari jarraipena emanez, Azpeitiko esku pilota taldeko ordezkariek Euskal Herriko Herriartekoaren finala jokatzeko txartela eskuratu dute. Finalaurrekoetan Iruñeari 3 eta 0 irabazi ostean, Amurrio izango dute aurkari Euskal Herriko Herriarteko Pilota Txapelketako finalean. Datorren igandean izango da hitzordua, 11:00etan hasita, Zornotzako (Bizkaia) Udal Pilotalekuan.
Sarrerak eta autobusak
Finalerako sarrerak igandean bertan jarriko dituzte salgai Zornotzako pilotalekuko leihatilan, eta bost euro balioko dute. Beraz, ez da aurrez sarrerak erosteko aukerarik izango.
Herritarrak finalera animatzeko eta bidaia errazteko, Ilunpe pilota elkarteak eta Azpeitiko Udalak doako autobusak antolatu dituzte iganderako. Autobus zerbitzu hori erabili nahi dutenek ostirala baino lehen eman beharko dute izena. Horretarako, bi aukera daude: Korrale eta Mugari tabernetan izena ematea edo ilunpeelkartea@gmail.com helbide elektronikora mezu bat bidaltzea. Izen-ematea egitean autobusez joango diren lagunen izen-abizenak eta pertsona kopurua zehaztu beharko dira. Igandean 09:15ean irtengo dira autobusak anbulatorio aurretik.
Azpeitiak hirutan irabazi du Euskal Herriko Herriarteko Txapelketa. Hain zuzen ere, 2008an, 2015ean eta iaz ekarri zuten txapela Azpeitira Ilunpeko pilotariek.