Atzokoa nahiko genuke beti, bana beti ezin da inoiz ez bezala gozatu. Atzokoaren moduko etapak oso tantaka ematen dira, eta nahiko argi zegoen Alpeetako bigarrena askoz kontrolatuagoa izango zela. Batez ere Jumbo-Visma taldeak daukalako agintea orain, eta talde horrek oso kontrol zorrotza jarriko duelako tropel buruan. Galibierren gora Van Aert jarri da polizia lanetan, eta hark nahi izan duenak bakarrik egin du aurrera. Jakina. UAEko inork hanka egitea ezinezkoa, Pogacarrek berak urrunetik jotzea bezala. Vingegaard askatuta ere zazpi txirrindulari bikain ditu Jumbok, eta Pogacarrek badaki makinaria findu horren aurka jai duela.
Vingegaarden aurkako buruz burukoetan ere bai, ziur aski. Alpe d'Huezen bi eraso bortitz egin ditu Pogacarrek, bere-bereak diren bi eraso kolpe, baina liderrak aise eutsi dio, ez da milimetro bakar bat urrundu Pogacarren gurpiletik. Hor ere Tourra jokatzen da, katuaren eta zakurraren arteko joko horretan, nork jo, nork eutsi. Gaur Vingegaard izan da Pogacarri esloveniarrak lehen astean bota zizkion desafio begiradak itzuli dizkiona. "Tourreko capoa ni nauk orain, Pogi", esan nahi izan dio, eta horrek psikologikoki mina egingo dio Pogacarri. Nola edo hala bi minutu eta erdiko atzerapena jan behar duelako, minutua behintzat bai, azken erlojupekoari begira. Non eta nola jan, baina, atzerapen hori?
Hurrengo etapetan gertatuko den bezala, bi lasterketa egongo dira aurrerantzean ere: etapa garaipena lortzeko bata, sailkapen nagusikoa bestea. Galibierren gora sei lagunek egin dute ihes, baina kamerek Tom Pidcockek Galibierren behera egin duen jaitsiera ikusgarria erakutsi dute. Ikusleren batek bihotzekoa jasateko modukoa, Pidcock teknikoki oso iaioa delako. Ez alferrik, munduko onenetakoa da mendi bizikletan eta ziklo-krosean, eta diziplina horietan derrigor izan behar duzu maisua teknikoki. Pidcockek ihesaldiarekin bat egin du eta bidea egin. Han zen Chris Froome zaharra, loria beste bide batzuen bitartez bilatu beharrean orain. Pidcockek erritmoan hautsi ditu aurkariak Alpe d'Huez-en, eta garaile helmugaratu da. Bukaera mitiko horretako inoizko etapa garaile gazteena da Ingalaterrako harribitxi berria.
Oilarren artean nobedade handirik ez. Vingegaard eta Pogi dira indartsuenak. Nahieran egiten dute aurrera biek bakarrik erritmoa bizitzen denean. Geraint Thomasek erantzuten die ondoen, eta Ineosekoak nagusiko hirugarren postua berreskuratu du, Bardetek helmugan segundo batzuk galduta. Yates, Gaudu eta Quintanak ere atzerapen apur bat pilatu dute, baina ziurrak dirudite Top 5-7an, Alpeetatik irteteko unean.
Bihar 13. etapa korrituko da, Le Bourg d'Oisans-Saint-Etienne. Alpeetatik Erdikaldeko Mendikatera egingo du tropelak, ibilbide gorabeheratsua, baina kontrolatzen erraza Jumborentzat. Ihesaldia iritsiko da bihar. Baita etzi, eta etzi damu ere. Hasi ehiztarien zerrenda osatzen. Uso pasa garai bete-betean murgildu da Tourra.
Alpeetako bigarrena atzokoa baino askoz zozoagoa izan da, Jumbok kontrol zorrotza jarri duelako; Vingegaardek aise eutsi die Pogacarren bi erasoei Alpe d'Huezen, eta Tom Pidcock gaztea historiako garaile gazteena bilakatu da bukaera mitiko hartan.