Nahia Olaizola eta Alaia Juaristi kirolariei harrera egin diete udaletxean

Nagore Alkorta alkatea, Nahia Olaizola patinatzailea, Alaia Juaristi eskiatzailea eta Egoitz Arruti Kirol batzordeburua, atzo. (Azpeitiko Udala)

Olaizolak patinaje artistikoan eta Juaristik iraupen eskian, biek ere emaitza bikainak erdietsi dituzte aurtengo denboraldian. Nagore Alkorta alkateak eta Egoitz Arruti Kirol batzordeburuak oroigarri bana eman zieten atzo arratsaldean, udaletxean egin zuten ekitaldian.

Aurtengo kirol denboraldiko lorpenengatik, Nahia Olaizola eta Alaia Juaristi kirolari gazteei harrera egin zieten atzo arratsaldean udaletxean. Olaizola patinaje artistikoan aritzen da; Juaristi, berriz, iraupen eskian, eta azken hilabeteotan garaipen eta sari esanguratsuak erdietsi dituzte biek ala biek. Nagore Alkorta alkateak eta Egoitz Arruti Kirol batzordeburuak oroigarri bana eman zieten atzoko ekitaldian.

Olaizolak zilarrezko domina eskuratu zuen martxoan, Valdemoron (Madril, Espainia) jokatu zuten  Patinaje artistikoko Espainiako Txapelketan; eta joan den azaroan, Budapesten (Hungaria), bere nazioarteko lehen txapelketan, hirugarren egitea lortu zuen. Juaristik, ostera, Espainiako Txapelketan lehen postua eskuratu du bi modalitatetan, Espainiako Kopako txapela bereganatu du, eta bere buruari jarria zion erronka nagusia ere bete du: Europako Kopara sailkatzea.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide