Marisa Gutierrezek 'Schubert nunca trabajo en justicia' libururako egindako ilustrazioen erakusketa, astelehenetik aurrera ikusgai

Marisa Gutierrez.

Hilaren 22tik martxoaren 10era bitartean Emakumeen Txokoan ikusgai izango dira Marisa Gutierrez artistak Miren Alcedok idatzitako libururako egindako ilustrazioak. Gutierrezek erabiltzen dituen tekniken artean collagea da protagonistetako bat.

Zabalik eta martxan da berriro Azpeitiko Emakumeen Txokoa, baita bertako eskaintza ere. Hori dela eta, astelehenetik aurrera Marisa Gutierrez artistak Miren Alcedo antropologoak idatzitako Schubert nunca trabajo en justicia libururako egindako ilustrazioen erakusketa izango da ikusgai Emakumeen Txokoan.

Otsailaren 22tik martxoaren 10era bitartean izango da zabalik erakusketa, eta bertan ikusgai izango dira Gutierrezek sortutako askotariko lanak Emakumeen Txokoko ohiko ordutegian: 09:00etatik 13:00etara eta 16:00etatik 19:00etara. Collage teknika da sortzaileak gehien erabiltzen duen teknika, baina bestelako ilustrazioak ere sortu ditu emakume funtzionarioek justizia administrazioan duten egunerokoan oinarritutako fikziozko lana irudiz janzteko. 

Erakusketaren azken egunean, martxoaren 10ean, Schubert nunca trabajo en justicia liburuaren egile Miren Alcedok solasaldia eskainiko du Emakumeen Txokoan 18:30ean hasita, ilustrazioen erakusketari amaiera borobila emateko.  

Erakusketan ikusgai izango den lanetako bat. (Marisa Gutierrez)

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide