Apirilaren 9an, larunbatez, egingo du Lagun Onak Mendi Bazkunak Azpeitia-Iruñea egitasmoko bigarren etapa. Hain zuzen ere, Tolosa eta Leitza arteko ibilbidea gauzatuko dute mendizaleek, Nafarroako lurretara iritsiz. Bidean, Leaburu eta Gaztelutik igaroko dira parte-hartzaileak, eta Ulizartik Aresora jaitsiko dira segidan. 24 kilometroko ibilbidea eginda, 16:30ak aldera Leitzara iritsiko dira mendizaleak.
Helduen egun osoko ibilaldia izango da, eta Tolosara joateko autobusa anbulatorioaren aurretik aterako da, 08:00etan. Autobuseko bidaia bost euro ordaindu beharko dute bazkideek, eta bazkide ez direnek, berriz, zortzi euro. Lagun Onak Mendi Bazkunaren webgunean eman daiteke txangorako izena.