Urtarrilean "erdizka" utzitakoari helduko dio Lagun Onak Mendi Bazkunak otsailean. Izan ere, otsailaren 12an, larunbatez, Domusa Teknik-40 MLK lasterketako ibilbidearen bigarren zatia egiteko aukera izango da.
Anbulatorioaren aurrean jarri dute hitzordua, 08:00etarako, eta handik autobusez joango dira Mandubiara. Handik oinez joango dira Azpeitira, aurretik Izazpitik, Samiñotik eta Xoxotetik barrena. Orotara, 30 kilometroko eta 1.700 metroko maldadun ibilbidea izango da.
Lagun Onak Mendi Bazkunaren webgunean eman daiteke txangorako izena, eta otsailaren 10a izango da horretarako azken eguna. Elkarteko bazkideek bost euro ordaindu beharko dute, eta zortzi euro, bazkide ez direnek.
Duela pare bat aste egin zuen Lagun Onak MBk ibilbidearen lehen zatia, eta 50 lagunetik gora animatu zen lasterketaren bidea ezagutzera.