Udako oporraldiaren ostean, bueltan da Lagun Onak Mendi Bazkunaren ohiko jarduna. Elkarte horrek jakinarazi duenez, hainbat ibilaldi egingo dituzte urtearen amaierara bitartean.
Urriaren 24an egingo dute lehen irteera, Izarraitzera; helduen ekintza izango da hori. Hurrengo egunean, berriz, Trinidadera joango dira gaztetxoak. Azaroaren 7an, Anbotoko gailurrera igoko dira helduak, eta azaroaren 15ean, Martirieta-Samiño-Azpeitia txangoa egingo dute gaztetxoek. Abenduaren 13an, Urkulutik Gurutzeberrira joango dira gaztetxoak, eta urteko azken egunean, Aizkorrira ohiko irteera egingo dute helduek.
Lagun Onak MBk azaldu duenez, behin-behineko egitaraua da prestatu dutena, eta ibilaldien egunak gerturatu ahala emango dituzte xehetasun gehiago.