Bueltan da arkupeko burrundara

Erabiltzailearen aurpegia
Hook taldea.

Arkupehotsak egitasmoaren laugarren edizioaren barruan, soinu berriak Sanagustingo arkupeko eszenatokira igotzen hasiko dira laster. Lehen kontzertua Ür eta Hook taldeek eskainiko dute datorren zapatuan, ekainaren 26an. 

Sortzaile berriak bultzatzeko xedez garatutako Arkupehotsak egitasmoaren laugarren edizioa martxan da jada. Ür eta Hook izango dira aspaldiko partez Sanagustingo arkupeko oholtza zapalduko duten bi taldeak. Ekainaren 26an, zapatua, izango dira kontzertuak, 18:00etan hasita. Doakoak badira ere, aurrez izena ematea komeni da, honako lotura honetan. Irailaren 4an, berriz, Etxekalte eta Habi taldeak oholtzaratuko dira Sanagustingo arkupean. Musika taldeek oraindik eman dezakete izena laugarren edizioan, izen-emate epe irekia baitu egitasmoak.

2011tik hona, Azpeitiko Kultur Mahaiaren kooperatibaren xedeetako bat izan da sortzaile berriei babesa eskaintzea. Arkupehotsak egitasmoa bide horretan sortu zen; batetik, kultur jarduna modu integralean jorratzeko; eta, bestetik, musikaren alorrari zentzua emateko eta musika modu zabalean lantzeko. Horregatik, programazioaz gain, sentsibilizazioa, sormen prozesua, publiko berriaren sustapena eta formazioa landu ditu Kulturazek. Kulturaz kooperatibaren egitasmoak laguntzaile ditu Azpeitiko Udala, Gipuzkoako Foru Aldundia eta Eusko Jaurlaritza. Bidelagun ditu, berriz, Badok ataria eta MusikaZuzenean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide