Dikazkan

Erabiltzailearen aurpegia da hau Iosu Badiola |
2005ko urr. 12a, 19:10

Lehengo astean karreratik irten eta ezagun batekin topo egin nuen. Bloglari naizela eta ez naizela, adarra jotzen hasi zitzaidan. Erantzunak nonbait ez dira webgunean bakarrik gelditzen. Astapistola xamarra da berau eta builan ari zenez beste lagun bat gerturatu zitzaigun. Honek ere ordurako blogen berri bazuen. Zalantza bat zeukan ordea: nire atalaren izenak, dikazkan hitzak, zer esan nahi ote duen.

Gure etxean beti entzun izan dudan hitza da dikazkan. Txikitan ikastolatik etxera merienda bila joaten nintzenean  gure ama sukaldean josten egoten zen Kostaldeko trena irratsaioa entzunez. Hori bakarrik zegoenean. Beste aukera, nire arrebak esaten zuen bezela, gaur bai  anbientie!, hau da, gure sukaldean ama eta bere lagunen batzuk josten egotea dizkazkan aritzen ziren bitartean. Batzutean Mª Anjeles, bestetan Maipili, edota Pakita…

Ikerketa txiki bat martxan jarri nuen eta inguruko inork ez du dikazkan hitza ezagutzen. Hiztegietan begiratu (Elhuyar,Lur eta interneten Euskaltzaindiaren Hiztegi batuan) eta han ere arrastorik ez. Amari galdetu eta Maipili, bere lagunaren aita zenak erabiltzen zuela esan dit. Karttoneneko Damianek. Haien etxean josiaz berriketan ari zirenean Damian azaldu eta “earki zaudete dikazkan” esaten omen zien. Hitz egin eta hitz egin, isildu ere egin gabe jarduten degunean dikazkan ari gerala esan nahi du. Jatorria zein duen, auskalo!

Adibide bat besterik ez da hau. Hitz eta esateko era mordo bat galtzen ari dira. Altxor bat daukagu gure zaharrengan eta zaintzen ez baditugu beraiekin batera joango dira denak.

Hau gutxi balitz erderakadak gero eta gehiago entzuten dira gazteen artean. Ia behingoz quedatzeaz aparte hitz zaharrak erabiltzen hasten zareten!

Bidali:  

Erantzunak

aukera bat | 2005-10-13 : 09:10

hitzaren jatorriari buruz, burutazio bat.
Jakinekoa da tertuliatan baditugula zenbait hitz edo esaldi motz behin eta berriz errepikatzen ditugunak, esamoldeak edo esanposturak. Hoietako batzuk erdarazkoak, eta hoietako bat, horrelakoetan asko errepikatu ohi dena ¡no me digas!
Igual, dikazkan hori, "digas-ka"-tik etorriko da ("no me digas"-ka ibiltzetik). Igual.

joxe | 2005-10-13 : 18:10

Hitzen jatorriaren gainean jardutea ere dikazkan jardutea izango da segurunez. Iritzira jardutea alegia. Horrekin lotuta, jardunaldiak antolatu dituzte Arantzazun, eta antolatzaileen artean azpeitiar bat ere badago. Helbide honetan dago informazio gehiago "sustatu.com":http://www.sustatu.com/1129148803 Hala ere, hor esaten direnak sinetsi baino lehen komeni da Ricardo Gómezek bere blogean esaten dituenak ere irakurtzea. Loturak Sustatuko artikuluaren erantzunetan daude.

erreko | 2005-10-13 : 18:10

Lehengo Astearteko afayen holaxe ibili hitzean, DIKAZKAN, ixiltzeko denboraik hartu gabe. Halare, esker mile. Hitz honek ze esan nahi dun azaltzeatik ta badizpat gu bezelako hiru builozoi tamainue hartzeatik.HI BETI IRAKASLE !!!!!!!!!!!!!

Blog irakurle bat | 2005-10-13 : 18:10

Ze afaritaz ari zarete? Ez zait iruditzen honako hau gauza pertsonalei buruz hitzegiteko leku egokiena, horretarako beste leku batzuk bilatzea eskertuko nizueke. Besteoi ez zaigu axola zuek zenbaterainoko builak atera, zenbateraino jan, edo eta ardoa ala garagardoa edan zenuten. Ez ezazue hau eraso pertsonal moduan hartu, blog honen funtzionamendua zaindu nahian nabil, besterik gabe.

Aurrekoari | 2005-10-14 : 11:10

Ez dut uste inork hemen bizi pertsonalik kontatu duenik. Afaria egin zutela eta builak atera zituztela besterik ez dute komentatu (inolako detailerik erantsi gabe). Horrela ezpalitz, agian euskaltzaindiako dokumentu bat emango zuen.
Fenomeno ari zara Iosu!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu