Eusko Jaurlaritzako Osasun Sailak duela minutu gutxi kaleratu du koronabirusari buruzko herriz herrikako txostena. Dokumentuan jakinarazi duenez, Azpeitian bi kasu positibo hauteman dituzte ostiraletik atzora bitartean egindako PCR eta antigeno probetan, biak atzoko probetan. Hori horrela izanik, azken hamalau egunetako 100.000 biztanleko intzidentzia tasak behera egin du. Ostiralean 124,84 zen zenbatekoa, eta azken hiru egunetako positiboen ondoren 118,27ra jaitsi da. Gogoan hartu behar da Eusko Jaurlaritzak 400dik gorako tasa duten herrietan itxiera perimetrala agindu zuela joan den astean. Nahiz eta oraindik urrun egon zenbateko horretatik, eremu horiaren barruan jarraitzen du Azpeitiak.
Urola Kosta eskualdean, gainontzean, hemeretzi kasu positibo hauteman dituzte. Kasu gehien Zarautzen detektatu dute: zortzi positibo. Kasu bat zenbatu zuten ostiralean, hiru larunbatean eta lau atzo. Intzidentzia tasa 235,58koa da Zarautzen, eta 5.000 biztanletik gorako eskualdeko herrien artean tasarik handiena duen herria da.
Azkoitian, berriz, sei kasu positibo zenbatu dituzte, lau ostiralean eta bi larunbatean. Intzidentzia tasak gora egin du han, 125,18an kokatuz. Zumaian, bestalde, lau kasu hauteman dituzte, hiru ostiralean eta bat larunbatean. Intzidentzia atsa 183,17koa da. Aian, ostera, kasu bat baieztatu dute, eta intzidentzia tasa 403,02koa da. Nahiz eta 400tik gorako tasa izan Aiak, Osasun Sailak apirilaren 6an eguneratuko du herrien inguruan egiten duen erresoluzioa.
Albiste onik ere utzi du asteburuak eskualdean; izan ere, Aizarnazabalen, Beizaman, Errezilen, Getarian, Zestoan eta Orion ez dute kasu positibo bakar bat ere hauteman. Hori horrela, Orio eremu berdera sartu da, 48,92ko intzidentzia tasarekin. Zestoak 282,49ko intzidentzia tasa du, baina positiborik hauteman ez duten gainerako lau herrietan intzidentzia tasa 0an dute.
500 kasuko langatik gora
Hego Euskal Herrian, 504 kasu positibo zenbatu zituzten atzo, igandea. Araban, Bizkaian eta Gipuzkoan 5.632 test diagnostiko egin zituzten, eta 362 positibo hauteman zituzten. 183 kasu baieztatu zituzten Bizkaian, 119 Gipuzkoan eta 57 Araban. Hala eta guztiz ere, hiru lurralde horietatik kanpo bizi diren hiru pertsonak ere positibo eman zuten gaixotasuna detektatzeko probaren batean. Nafarroan, berriz 1.713 test egin zituzten atzo, eta 142 kasu positibo hauteman zituzten. Hori horrela, positibotasun tasa igo egin da berriz ere han; %8,3koa da datua Nafarroan.
Ospitaleen egoerari ere egin dio aipamena Osakidetzako txostenak. COVIDaren ondorioz 24 pertsona ospitaleratu ziren atzo, eta COVIDa duten 85 pertsona ZIUn daude. Gaur-gaurkoz 278 lagun daude Araba, Bizkai edo Gipuzkoako erietxeetan ospitaleratuta; martxoaren 15az geroztik Osakidetzako erietxeetan duten kopuru handiena da hori.
Oinarrizko birsorkuntza tasak edo R0 indizeak, bestalde, behera egin asteburuan, baina, halere, joan den astekoa baino altuagoa da; 1,19koa da batez besteko zenbatekoa Araban, Bizkaian eta Gipuzkoan, eta 1,29koa Gipuzkoan. Indize horren arabera, kutsatutako pertsona bakoitzak pertsona bat baino gehiago kutsatzeko arriskua du.