Joanes Balentziagak eta Ander Lizarraldek jantzi dute txapela Azpeitiko zezen plazan jokatutako Euskal Herriko IV. Uztai Sariketan. Euria goian behean ari zela, 12:00etan ekin diote Behi Suharraren IV. Egunerako antolatutako ekintzei, uztai txapelketarekin. Eguraldiak lagundu ez badu ere jende ugari bertaratu da ikuskizunaz gozatzera, eta giro ederra izan da zezen plazan.
Guztira, hamar ganadutegik parte hartu dute Behi Suharraren Egunean: Bergarako Zezenak, Manzarbeitia, Leizarran, Marques de Saka, Ibiri, Lopene, Zelai Luze, Arno, Ruso eta Azpeitiko Berrosueta. Ganadutegi bakoitzak behi bat jarri du, eta behi bakoitzarekin errekortari bikote bat aritu da. Estu egon da lehia, parte hartu duten bikote gehienek uztai bat sartzea lortu baitute. Berdinketa egon denez, epaimahaiak beste irizpide baten arabera aukeratu ditu txapeldunak. Hain zuzen, uztaia azkarren sartu duen bikotea izendatu dute irabazle. Horrenbestez, Joanes Balentziaga azkoitiarrak eta Ander Lizarralde billabonatarrak jantzi dute txapela.
Euskal Herriko IV. Uztai Sariketan parte hartu dute Eneko Martija, Urko Arrieta eta Xabi Iturralde azpeitiarrek, eta ikuskizun ederra eskaini dute hirurek. Ander Carpintero eta June Urain errekortari azpeitiarrek ere parte hartu dute goizeko saioan, eta haien errekorteez gozatzeko aukera izan dute zezen plazara bertaratu diren lagunek.
Uztai Txapelketako irabazleak ez ezik, proba horretan erabaki dute zein izan den behirik suharrena; hau da, ausartena edo errekortariei zailtasun gehien jarri dizkiena. Bergarako Zezenak ganadutegiko Begibeltz izan da behirik onena, Balentziagarekin eta Lizarralderekin aritu den behia, hain zuzen.
17:30ean jarraituko dute gaurko antolatutako egitarauarekin.