Sexu indarkeriaren eta mito matxisten eragina eta inpaktua emakumeon bizitzetan gai hartuta mahai ingurua egin zuten atzo, astelehena, arratsaldean Sanagustin kulturgunean. Nerea Barjola politilogoa eta ekintzaile feminista eta Idoia Arraiza Emagin ikerketa eta dokumentazio zentroko kidea izan ziren hizlariak, eta Aurora Iturrioz Garaipen talde feministako kideak dinamizatu zuen saioa. Martxoaren 8aren bueltan Emakumeen Txokoak antolatutako saioetako bat izan zen atzokoa. Barjolak berak gazteekin sexu indarkeriaz egindako hainbat ikerketari buruz jardun zuen, eta Arraizak Emaginetik egiten duten lanaz hitz egin zuen. Sexu indarkeriaren inguruan egiten diren politika publikoez ere jardun zuten.
Autofedentsa Feminista ikastaroa, larunbatean
Martxoaren 8aren bueltan Emakumeen Txokoak antolatutako beste ekintzetako bat Autodefentsa Feminista ikastaroa da. Tailer hori larunbatean, martxoaren 23an, izango da 10:00etatik 14:00etara artean, Emakumeen Txokoan bertan. Emagin elkarteak emango du. Ikastaroan parte hartzeko aurrez izena eman behar da 688 75 10 00 telefono zenbakira idatzita edota deituta. Izena emateko epea bihar asteazkena bukatuko da.
Emakumeen Txokoak azaldu duenez, Autodefentsa Feminista ikastaroaren helburua, "emakumeek egunero jasaten dituzten eraso sexistei erantzuteko estrategiak garatzea" da. "Horretarako, indarkeriarekiko ditugun bizipenak trukatuko ditugu, eta gure esperientzietatik abiatuta, eraso sexistak identifikatzen ikasiko dugu", azaldu dute. Horrez gainera,. maila indibidualean zein kolektiboan martxan jarri beharreko hainbat estrategia garatzeko tartea hartuko dute.