Statkraft, Norvegiako energia enpresa nagusia, %100ean bertako gobernuarena da. Suedian gauza bera gertatzen da, bertako energia enpresa nagusia %100ean da gobernuarena. Danimarkan, aldiz, %50,1 da gobernuarena, eta Austrian %51. Euskal Herrian, Espainian bezala, %0 da gobernuen parte hartzea bertako energia enpresa nagusietan. Oñatiko etxebizitza guztiak argindarrez hornitzeko gaitasuna duen Oñatiko Ur Jauziak enpresa norena da? Udalarena %81ean.
Zer lortzen du gobernu batek bere lurraldeko energia enpresen jabe izatearekin? Besteak beste, energia iturrien salmenta prezioak (gasaren edo argindarraren faktura) kontrolatzea, gizartearen beharretara egokitzea eta irabaziak bereganatzea. Energia guztion ondasuna baita.
Norena da Iberdrola? Norges Bank, Norvegiako banku zentrala, Iberdrolako hirugarren akziodun nagusia da. Zenbatekoak izan ziren Iberdrolaren diru irabazi garbiak 2021ean? 3.885 miloi eurokoak. Nora doaz haren inbertsio nagusiak? Ameriketako Estatu Batuetara.