Koronabirusa Azpeitian

Marka guztiak hautsita, 8.600ekoa da Azpeitiko intzidentzia tasa

Guztira, 342 kasu hauteman dituzte herrian azken hiru egunetan, eta inoizko intzidentzia tasarik altuena du uneotan Azpeitiak. Pandemia hasi zenetik, Azpeitiko herritarren %32k eman du positibo PCR edo antigeno proba batean.

Eusko Jaurlaritzaren Osasun Sailak argitaratu ditu azken hiru egunetan egindako PCR eta antigeno proben emaitzak, eta etenik gabe goraka jarraitzen dute herri gehienetako intzidentzia tasek. Guztira, 1.380 izan dira eskualdean emaitza positiboak, eta horietatik 342 Azpeitian atzeman dituzte. Beste behin, marka guztiak hautsi ditu herriko intzidentzia tasak, eta une honetan 8.600,53koa da tasa, eskualdeko herri denetatik altuena. Pandemia hasi zenetik, Azpeitiko herritarren %32k eman du positibo PCR eta antigeno proba batean, nahiz eta Osakidetzak ez duen zehazten positiboek lehen edo bigarren aldia duten positibo ematen dutena. Bestalde, Azkoitian ere nabarmen egin dute gora kasuek, eta 315 positibo zenbatuta, 8.161,56ra igo da tasa; horrenbestez, tasarik altuena duen Urola Kostako bigarren herria da.

Zarautzen ere egoera ez da askoz hobea, eta 288 kasu berrirekin 5.563,88an kokatu da hango tasa. Zumaia da hurrengoa kasu kopuru altuenen zerrendan, eta 180 positibo berri zenbatuta, 7.189,29ra igo da tasa metatua. Orion, bestalde, 79 kasu izan dira eta 5.039,14koa da tasa. 5.000 biztanletik beherako herrien kasuan, bestalde, honakoak dira zenbatutako kasu kopuruak eta tasak: Getarian 62 kasu eta 7.349,82ko tasa, Zestoan 58 kasu eta 6.317,41eko tasa, Aian 34 kasu eta 5.239,29ko tasa, Errezilen hamalau kasu eta 4.347,83ko tasa, Aizarnazabalen zazpi kasu eta 6.371,91ko tasa eta Beizaman kasu bat eta 4.032,26ko tasa. Horrenbestez, herri guzti-guztietan zenbatu dituzte azken hiru egunetan positiboak.

Hego Euskal Herrian, 16.642 positibo

Koronabirusak eragindako positibo kasuek hedatzen jarraitzen dute Hego Euskal Herrian ere, eta atzo, asteazkena 41.669 PCR eta antigeno probetatik 16.642 izan ziren emaitza positiboak. Lurraldez lurralde, honakoak dira datuak: Bizkaian 7.197, Gipuzkoan 3.934, Nafarroan 3.384 eta Araban 2.005. Bestalde, Nafarroan %47,9 da positibotasun tasa, eta Araban, Bizkaian eta Gipuzkoan %38,3.

Ospitaleratzeei dagokienez, berriz, 753 pertsona daude ospitaleratuta Araban, Bizkaian eta Gipuzkoan, eta horietatik 122 dira ZIUetan daudenak. Nafarroan, aldiz, 241 pertsona daude erietxeetan eta 21 dira ZIUetan daudenak.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide