Ro musika taldeak Barakaldoko (Bizkaia) Hiriko Soinuak lehiaketako sari nagusia irabazi du. El Viejo Chimango eta Unai taldeak ziren beste hautagaiak, baina epaimahaiak Azkoitiko eta Azpeitiko musikariz osatutako taldea saritzea erabaki du. Atzo iluntzean jakinarazi zuten epaiaren berri.
Hiriko Soinuak Barakaldoko Udalaren kultur proiektu bat da, musika artistak bilatu eta horiek sustatzeko. Era berean, musika industriarekin lehen hartueman profesionala izateko eta musika kultura sustatzeko aukera ere eman nahi du proiektuak.
Ro musika taldea, berriz, rock instrumentala eta post-rock estiloak uztartzen dituen taldea da, eta Gorka Alcaldek —gitarra— Josu Usobiagak —bateria—, Iñigo Gonzalezek —gitarra— Mikel Iraetak —sintetizatzailea eta teklatua— eta Iker Amenabarrek —baxua— osatzen dute bostekoa.