Dinaguren 'Nomadak gaitun!' azoka ibiltariak Azpeitian egin du lehen geldialdia

Azoka Plazan egin dute Dinagu Euskal Herriko emakume sortzaileen kolektiboak antolatutako Nomadak gaitun! azoka. Bertan, bitxigintzan, modan, dekorazioan zein ilustrazioan aritzen diren Euskal Herriko hainbat txokotako hogei emakume sortzailearen produktuak izan dira eskuragarri, baita emakume baserritarrek prestatutako jakiak dastatzeko aukera ere. Antolatzaileak "pozik" agertu dira egitasmoak izan duen harrerarekin. 

Nomadak gaitun! azoka ibiltaria jarri du martxan Dinagu Euskal Herriko emakume sortzaileen kolektiboak, eta gaur egin du lehen geldialdia Azpeitian. Azoka Plazan jarri dituzte postuak, eta jende ugari ibili da azokan, goizetik arratsaldera bitartean. Bitxigintzan, modan, dekorazioan zein ilustrazioan aritzen diren Euskal Herriko hainbat txokotako hogei emakume sortzailearen produktuak izan dira eskuragarri.

Azokara hurbildu direnek arropa, bitxiak eta era askotako apaingarriak erosteko aukera ez ezik, jan-edanerako aukera ere izan dute. Izan ere, azokak iraun duen bitartean, hainbat emakume baserritarrek Elikaguneko sukaldean prestatutako jakiak dastatzeko aukera izan da. Arratsaldean eman diote amaiera azoka ibiltariari, eta antolatzaileak gustura agertu dira egitasmoan izan duen harrerarekin.

Dagoeneko hasi dira hurrengo azoka prestatzen, baina ez dute xehetasunik aurreratu; izan ere, Dinaguk mimoz egin nahi du lan, saturatu gabe, eta horrelako egitasmo batek eskatzen duen denbora eskainiz.  

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide