Eusko Jaurlaritzako Osasun Sailak kaleratu berri du koronabirusaren bilakaeraren inguruko eguerdiroko txostena, eta horren arabera, atzo hiru positibo atzeman zituzten herrian. Hamalau eguneko 100.000 biztanleko intzidentzia tasak ez du gorabeherarik izan eta 328,52koa da. Eremu laranjan jarraitzen du herriak.
Eskualdean, berriz, hamar positibo zenbatu zituzten atzo, herenegun baino hiru kasu gehiago. Azpeitiko hiru kasuez gain, bina kasu atzeman zituzten Getarian, Zarautzen eta Zumaian, eta eremu horian kokatuta daude kostaldeko hiru herri horiek; 141,34ko intzidentzia tasa du Getariak, Zarautzen 162,76koa da eta Zumaian 254,40koa. Azkoitian hauteman zuten beste positiboa. Atzotik jaitsiera nabarmena izan du hango intzidentzia tasak: 517,40koa zen atzo eta 450,64koa da gaur. Hala eta guztiz ere, tasa 400dik gorakoa izanik, eremu gorrian jarraitzen du Azkoitiak.
Aian, Aizarnazabalen, Beizaman, Errezilen, Orion eta Zestoan ez zuten positibo berririk atzeman atzo. Honako hauek dira herri bakoitzeko intzidentzia tasak: Aiakoa 50,38koa; Aizarnazabalgoa 260,38koa; Errezilgoa 161,03koa; Oriokoa 293,54koa; eta Zestoakoa 51,36koa. Beizaman, berriz, ez dute positiborik izan azken hamalau egunetan.