Urola Kosta eskualdea osatzen duten txoko, istorio eta protagonistei ahotsa ematea du helburu GUKA magazinak, eta hilabete honetako eskaintzarekin ere ez du ikuslea hotz utziko. Oraingoan, Orio bisitatu du Mireia Galarza kazetariak, eta Nadeth Agirre oriotarren traineruko patroiarekin izan da solasean.
Horrez gain, baina, beste hainbat atal ere izango ditu magazinaren laugarren atalak. Urrutira joan gabe atalean, kostatik barrualderantz egin dute, eta Aizarnazabaldik abiatuta, txango polita proposatuko du Gorka Peñagarikanok. Azpeitiko Sokaitz eskalada taldekoekin ere hitz egingo du Maialen Etxaniz kazetariak, eta Zumaiako mugez ariko dira solasean Mireia Galarza eta Imanol Azkue. Hilero bezala, eskualdeko kultur hitzordu erakargarrienak ekarriko ditu Andoni Elduaien kazetariak.