Salgai daude 'Erik eta Win' bertso saio musikaturako sarrerak

Lizarralde eta Muñoa Hernanin eskaini zuten saioan. (Kronika.eus)

Apirilaren 16an izango da ikuskizuna, Soreasu antzokian, eta dagoeneko eros daitezke sarrerak zortzi euroren trukean. Unai Muñoa eta Ander Lizarralde bertsolariek bertsoa, poesia, antzerkia eta musika landuko dituzte, Imanol Kamio eta Aitor Atxega musikariekin batera eskainiko duten saioan.

Unai Muñoa eta Ander Lizarralde bertsolariek Erik eta Win bertso saio musikatua eskainiko dute apirilaren 16an, ostirala, Soreasu antzokian (19:30), eta emanaldirako sarrerak salgai daude Kulturaz kooperatibaren webgunean –aurrez zortzi eurotan eta hamar eurotan egunean bertan–.

Asier Sotak gidatutako obra da Erik eta Win, eta emanaldiaren gidoia Muñoak eta Lizarraldek ondu dute. Imanol Kamio eta Aitor Atxega musikariekin izango dira bi bertsolariak agertokian, eta horiek doinu berriak plazaratuko dituzte. Besteak beste, bertsoa, poesia, antzerkia eta musika landuko dituzte ikuskizunean. Umorea da, gainera, antzerki tartearen ezaugarri nagusia.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide