Garaipen erosoa lortu du Azkoitia-Azpeitia ISBk Rosaliaren aurka

Gaurko partidaren irudi bat. (Mikel Amenabar)

Denboraldiko hamabosgarren garaipena batu dute Iraurgikoek gaur (80-57), eta LF2 ligaren A multzoko sailkapenean hirugarren postuan daude.

Azkoitia-Azpeitia ISB saskibaloi taldeak beste garaipen bat eskuratu du, denboraldiko hamabosgarrena, gaur eguerdian Azkoitiko kiroldegian. Compostelako (Galizia) Ulla Oil Rosaliari irabazi diote Iraurgikoek, 80-57.

Bukaerako markagailuak adierazten duenez, garaipen erosoa izan da gaurkoa Andoni Lazkanok zuzentzen duen taldearentzat. Partida hasieran, ordea, nahi baino estuago ibili dira etxekoak. LF2ko A multzoko sailkapenaren behekaldean dabil Rosalia, baina lehen laurdenean ezustean harrapatu ditu ISBkoak. Estreinako laurden txarra jokatu dute Iraurgikoek, azken minutuak, batik bat, eta 15-16 atzetik bukatu dute. Ezustekoari luzamendurik eman gabe, oso bestelakoa izan da bigarren laurdena: 25 eta 12ko partzialari esker, atsedenaldian 40 eta 28 aurretik ziren etxekoak. Hirugarren laurdenean bigarrengoaren nagusitasunari eutsi dio Azkoitia-Azpeitia ISBk; 25 eta 16 izan da laurden horretako partziala. Garaipena oso bideratuta zutela, laugarrn eta azken laurdenean lasaiago ibili dira Lazkanorenak. Iraurgikoen artean zortzi jokalarik lortu dute hamar puntutik gora saskiratzea, horietatik seik hogei puntuen langa gainditu dute, eta hiru 30 puntutik gora ibili dira. Morgan Green izan da guztien buru, 34 punturekin.

Gaurko garaipenarekin, bere multzoko sailkapenaren hirugarren tokian da Azkoitia-Azpeitia ISB.

Atsedena Juaristi ISBrentzat

Asteburu honetan atseden hartu ahal izan du Juaristi ISBk, Zilarrezko LEB Ligan jardunaldirik ez baita jokatu.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide