Aukeratu dituzte Erremonteko 50. Binakako Txapelketako finalerako pilotak

Erremonteko 50. Binakako Txapelketako finaleko materiala aukeratu dute. (Argazkia: Maialen Andres)

Labaka eta Aizpuru III.a erremontista azpeitiarrek elkarren kontra jokatuko dute larunbatean, urtarrilaren 2an, Erremonteko 50. Binakako Txapelketako finala. Labaka Urrizarekin ariko da bikotea osatuta eta Aizpuru III.a Ansa II.arekin. Atzo, asteazkena, aukeratu zituzten finalerako pilotak Hernaniko (Gipuzkoa) Galarreta pilotalekuan.

Erremonteko 50. Binakako Txapelketako finalerako zortzi pilotak atzo asteazkena aukeratu zituzten Urriza-Labakak eta Ansa II.a-Aizpuru III.ak. Bi bikoteak gustura gelditu ziren aukeratutako materialarekin. Aizpuruk-eta aurkariek baino denbora gehiago behar izan zuten pilotak aukeratzeko, eta biziagoak aukeratu zituzten. Ansa II-Aizpuru III bikoteak azaldu zuenez, "finaleko partida gogor bat interesatzen zaigu, luzea eta pilotakada askokoa".

Jagoba Labaka eta Joxin Aizpuru Aizpuru III.a bi erremontista azpeitiarrak nor baino nor ariko dira larunbatean, urtarrilaren 2an, Hernaniko Galarreta pilotalekuan jokatuko duten binakako txapelketako finalean. 15:30ean hasiko da, eta ETB1ek zuzenean eskainiko du. Finalaren aurretik erremonteko beste partida bat jokatuko dute Juanenea-Endikak eta Goikoetxea V-Barrenetxea IV.ak.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide