Koronabirusa Azpeitian

Positibo gutxiago zenbatu dituzte Hego Euskal Herrian

Herenegun baino 63 pertsona gutxiagok eman zuten atzo positibo lau lurraldeetan, eta positibotasun tasak beherantz jarraitzen du; %3,9ra jaitsi da Nafarroan, eta %5,3ra Araban, Bizkaian eta Gipuzkoan.

Eusko Jaurlaritzak eta Nafarroako Gobernuak atzo baino datu baikorragoak eman dituzte gaur, zapatua, COVID-19aren inguruan. Atzo, 14.291 PCR eta antigeno proba egin zituzten Osakidetzak eta Osasunbideak Hego Euskal Herrian, eta horietatik 722 pertsonak eman zuten positibo. Beraz, herenegun baino 63 kasu gutxiago hauteman dituzte lau lurraldeetan, eta duela astebete baino 279 kasu gutxiago.

Positiboen tasan ere nabari da jaitsiera; izan ere, %3,9ra jaitsi da Nafarroan eta %5,3ra Araban, Bizkaian eta Gipuzkoan. Lurraldez lurralde, Bizkaian atzeman dituzte kasurik gehien: 309. Gainontzeko lurraldeetan honakoak izan dira datuak: Gipuzkoan 233, Nafarroan 104 eta Araban 73. Asteburuetan ez du herriz herriko datuen berri ematen Osasun Sailak.

Ospitaleratzeei dagokienez, berriz, 47 pertsona sartu zituzten atzo Arabako, Bizkaiko eta Gipuzkoako erietxeetan, eta Zainketa Intentsiboko Unitateetan (ZIU) 130 pertsona daude. Nafarroako Gobernuak gaurkoan ez du ospitaleratzeen gaineko informaziorik eskaini.

Nafarroako Gobernuak jakinarazi duenez, atzo 1.675 proba egin zituzten, eta horietatik 101 izan ziren hautemandako positiboak, herenegun baino hiru gutxiago. 

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide