Babestutako edukia

Ireki dute Azpeitian aisialdiko begirale titulua ateratzeko ikastarorako izen-ematea

Batxilergoko lehen eta bigarren mailako ikasleei zuzendutako ikastaroa eskainiko du Aisiola begirale eskolak Azpeitiko Ikastola Ikasberrin. Atal teorikoa eta praktikoa izango ditu ikastaroak, eta egiten dutenek haurren eta gazteen aisialdiko jardueren dinamizazioarako ziurtagiria eta Eusko Jaurlaritzako haur eta gazteen aisialdirako begirale diploma eskuratuko dituzte. Dagoeneko eman daiteke izena begirale ikastaroan. 

Aisiola begirale eskolak haurren eta gazteen aisialdiko jardueren begirale titulua ateratzeko ikastaroa antolatu du batxilergoko lehen eta bigarren mailako ikasleei zuzenduta. Azpeitiko Ikastola Ikasberrin eskainiko dute ikastaroa, eta dagoeneko ireki dute izen-ematea. Ikasberriko ikasleek nahiz bertako ikasle ez direnek eman dezakete izena begirale titulua ateratzeko ikastaroan. 

Bi atal izango dituzte Aisiolaren eskolek: atal teorikoa eta praktikoa, 150 orduko ikastaro teorikoa eta 160 orduk praktikaldia, eta ikastaroa urte bakarrean edo bi urtetan egiteko aukera izango dute bertan izena ematen dutenek. Hau da, aukera bat da ikastaroa bi ikasturtetan egitea –DBHO1 eta DBHO2– eta bestea ikasturte bakarrean egitea –DBHO2–. Ikastaroa amaitzen duten pertsonek haurren eta gazteen aisialdiko jardueren dinamizazioarako ziurtagiria eta Eusko Jaurlaritzako haur eta gazteen aisialdirako begirale diploma eskuratuko dituzte. 

Batxilergoko bigarren mailako ikasleek 2020ko azarotik 2021eko ekainera bitartean izango dituzte titulua ateratzeko saioak, ostiral arratsaldez. Batxilergoko aurreneko mailakoek, aldiz, 2021eko urtarriletik 2021eko maiatzera bitartean, horiek ere ostiral arratsaldez. 
 

Izen-ematearen prezioa 430 euro izango da Ikastolen Elkarteko bazkideentzat, eta bazkide ez direnentzat 475 euro. Ikastaroan izena eman nahi dutenek edo informazio zehatzagoa jaso nahi dutenek Azpeitiko Ikastola Ikasberrira deitu besterik ez dute.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide