Koronabirusa Azpeitian

PCR probetan beste lau kasu positibo atzeman ditu Osasun Sailak Azpeitian

Azken bi egunetan Osakidetzak lau kasu berri zenbatu zituen herrian, baina atzo egindako probetan beste lau kasu atzeman ditu. Eskualdean guztira 17 kasu detektatu ditu Osasun Sailak. Araban, Bizkaian eta Gipuzkoan, berriz, 635 kasu positibo.

Azpeitian beste lau lagunek eman dute positibo PCR probetan. Astelehenean eta asteartean egindako PCRetan Osakidetzak lau kasu atzeman zituen, baina atzo, asteazkena, egindako probetan beste lau kasu berri zenbatu ditu.

Eskualdean, bestalde, 17 kasu atzeman ditu Osakidetzak. Azpeitiko lau kasuez gain, Azkoitian, Orion eta Zarautzen ere launa kasu zenbatu ditu Osasun Sailak, eta kasu bat Zumaian. Gainerako eskualdeko herrietan ez da kasu berririk izan. Herenegun egindako PCR probetan zortzi kasu agertu ziren, atzo baino bederatzi gutxiago.

Eusko Jaurlaritzaren Osasun Sailak 8.389 PCR proba egin zituen atzoko egunean Araban, Bizkaian eta Gipuzkoan, eta guzti horietatik 635 lagunek eman dute positibo (%7,5). Araban 97 kasu atzeman zituen Osakidetzak atzo, 342 Bizkaian eta 174 Gipuzkoan. Halaber, hiru lurraldee horietatik kanpo bizi diren 22 lagunek ere eman dute positibo. Atzo 55 lagun gehiago ospitaleratu zituzten gaitzak jota, eta Osasun Sailak emandako datuen arabera, 233 lagun daude egun Arabako, Bizkaiko eta Gipuzkoako ospitaleetan ospitaleratuta. Zainketa Intentsiboen Unitatean (ZIU) 55 lagun daude. RO indizea, berriz, 1,04 da Osakidetzaren arabera.

Nafarroan, berriz, gorakada nabarmena izan du positibo kopuruak azken orduetan: 340 zenbatu dituzte, pandemia hasi zenetik egun bakar batean izan duten kopuru altuena. 3.148 PCR proben emaitzak dira horiek; egindako PCR-en %10,6 izan dira positiboak. Pertsona bat hil da azken orduetan COVID-19 gaitzak jota eta 18 lagun ospitaleratu zituzten atzo Nafarroako ospitaleetan gaitz horrekin, baina horietako inor ez ZIUn.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide