Koronabirusa Azpeitian

Eskola kirola bertan behera geldituko da behin betiko

Eskola kirol jardueren barruan mendi irteera, 2018an. (Lagun Onak MB)

Gipuzkoako Foru Aldundiaren Kultura eta Kirol departamenduak gaur jakinarazi du erabakia. Datorren ikasturteko eskola kirol jarduerak nola egin aztertzeari ekingo diote orain.

Alarma egoera ezarri zenetik, eskola kiroleko jardunaldiak eta saioak etenda egon dira behin-behinean. Orain, Gipuzkoako Foru Aldundiak 2019-2020 ikasturteko eskola kirola behin betiko bertan behera uztea erabaki du. Gipuzkoako Foru Aldundiaren Kultura eta Kirol departamenduaren erabakiak "ikasleen osasuna babestu" nahi du, "kirol lehiaketak ez baitu ahalbidetzen osasun arloko agintariek gomendatutako distantzia fisikoa mantentzea".

Aldundiaz gainera, udalek, ikastetxeek, federazioek eta klubek parte hartzen dute eskola kirolean, eta guztira, 40 kirol modalitate inguru eskaintzen dira. Eskola kirolaren barruko lehiaketetan 33.000 ikaslek parte hartzen dute Gipuzkoa osoan; eta 20.000 ikaslek, berriz, hastapen jardueretan.

Datorren ikasturteari begira, aldundia aztertzen ari da eskola kiroleko ekintzak nola antolatu, parte hartzaileen "segurtasuna" kontuan hartuta. Aldundiak dei egin die haur zein gurasoei etxean zein kalean kirola egiten jarraitzera, "beti ere beharrezko segurtasun neurriak hartuta".

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide