Aste hasierako datuak oso baikorrak baziren ere, azken orduetan beste koronabirus kasu bat baieztatu dute Azpeitian. Azken horrekin, hamabi dira COVID-19 gaitzaz kutsatutako herritarrak, Eusko Jaurlaritzak emandako datuen arabera. Azpeitikoaz gain, beste lau kasu ere baieztatu dituzte eskualdean azken orduetan: bi Zarautzen, eta bana Azkoitian eta Getarian. Positibo berri horiekin, eta zenbaketekin hasi zirenetik, testak egin dizkieten Urola Kostako 229 herritarrek eman dute positibo proban.
Gainontzeko herrietan ez da aldatu COVID-19arekin kutsatutako pertsonen kopurua. Herriz herri, honako hauek dira koronabirus kasu metatuak: 126 kasu baieztatu dituzte Zarautzen, 47 kasu Zumaian, hamasei Orion, hamabost Azkoitian, hamabi Azpeitian, launa Getarian eta Zestoan, hiru Aian eta bi Aizarnazabalen.
Eusko Jaurlaritzaren datuek kopuru horiek jasotzen dituzte, baina kontuan hartu behar da koronabirusaren pandemia hasi zenetik sendatu edo zendu diren bizilagunak ere badirela. Beraz, ezin da jakin ziurtasun osoz zenbat pertsona dauden gaur egun COVID-19 gaitzaz kutsatuta.
Lurraldekako datuak
Osakidetzak jakinarazi duenez, atzo 4.968 PCR proba eta 4.441 test azkar egin zituzten –inoizko kopururik handiena, atzo baino 2.020 gehiago–, eta 348 kasu berri atzeman dituzte Araban, Bizkaian eta Gipuzkoan. Proba egin dioten pertsonen %7k eman du positibo azken datuen arabera. Hiru lurralde horietan, 19 pertsona hil ziren atzo, eta 323 lagun osatu ziren. Guztira, 1.212 pertsona hil dira krisia hasi zenetik Araban, Bizkaian eta Gipuzkoan.
Nafarroan, berriz, 94 kasu berri atzeman dituzte azken orduetan. Guztira, 5.274 koronabirus kasu atzeman dituzte kontaketa hasi zutenetik, eta 429 lagun hil dira gaitzaren ondorioz; horietako hamabi, azken orduetan. Guztira, 1.737 lagun sendatu dira Nafarroan.