Baigera jubilatuen elkarteak ere bertan behera utzi ditu gaurtik aurrerako antolatuta zituen ekintza guztiak. Besteak beste, ez dituzte egingo martxoaren 21eko Zestoa eta Azpeitia arteko ibilaldia eta martxoaren 26ko batzar orokorra. Gainera, pentsio duinen aldeko astelehenetako elkarretaratzeak ere ez dituzte gauzatuko, eta zunba, yoga, pilates eta dantza saio oro ere ez dute egingo. Bestalde, Baigera Ieko taberna eta jatetxea ere itxita izango dira.
Eusko Jaurlaritzaren, Osakidetzaren eta Azpeitiko Udalaren argibideei kasu eginez, neurri horiek hartzea erabaki du elkarteak. "Momentu honetan bizitzen ari garen egoera zein den ikusita, prebentzio neurriak bete behar ditugu guk ere, beste elkarteek, instituzioek edo taldeek bezala", azaldu dute Baigerakoek. Horiek adierazi dutenez, "argi" dute neurri horiek hartzeak eragozpenak sortuko dizkiela eguneroko bizitzan, baina egoerari buelta "ahalik eta azkarren" ematea espero dute, "eguneroko normaltsunera" itzultzeko.