Soziedad Alkoholika (SA) eta Saia Goait musika taldeak zuzenean arituko dira Sanagustin kulturgunean azaroaren 9an, eta Kulturaz kooperatibak jakinarazi duenez, amaitzear daude kontzertuetarako sarrerak.
Txartelak Sanagustin kulturgunean nahiz Kulturaz kooperatibaren webgunean daude salgai, 16 eurotan. Kultur Bonoa duten herritarrek bonoa erabiltzeko aukera izango dute azaroaren 9ko kontzertuetarako. Zuzenekoak 22:30ean hasiko dira.
1988an sortu zen Soziedad Alkoholika taldea Gasteizen (Araba). Crossover thrash musika egiten dute, eta beren abestien letretan hainbat gairen inguruko kritika da nagusi. Salatzen dituzten gaietako batzuk dira militarismoa, faxismoa, arrazakeria eta sexismoa, besteak beste. Beren ibilbidean 350.000 disko baino gehiago saldu dituzte SAko musikariek. Azaroaren 9an Saia Goait musika taldeak elkarbanatuko du oholtza Soziedad Alkoholikarekin. Mutrikuko taldea da Saia Goait. Hainbat taldetan jardundako musikariek (Keike, Kraussk, Karenka) osatzen dute taldea, eta sortzaileen hitzetan, "stoner rock eta hard rockaren zurrunbiloan ahots melodiko eta guturalak" nahasten dituzte beren abestietan.