Giro ederrean pasatu dute Izarraitz igeri elkartearen eguna

Giro ederrean ospatu zuten Izarraitzeko kideek igeri elkartearen eguna atzo, zapatua. Igerilariek, entrenatzaileek eta gurasoek igeriketa jaialdia egin zuten arratsaldean; hain zuzen ere, lagun artean hainbat proba egin zute horiek igerilekuan. Igeriketa saioa bukatzean, goxokiak banatu zizkieten gaztetxoenei.

Taldeko helduenek afaria egin zuten ondoren; 40 bat lagun elkartu ziren Ongi Etorri jatetxean. Afalostean, joan zen denboraldian Espainiako igeriketa txapelketetan podiumera igotzea lortu zuten kideak omendu zituen Izarraitzek; hain zuzen ere, aitortza jaso zuten Maialen Sudupek, Iker Aizpuruk, Pablo Etxeberriak eta Rafa Zubeldiak. Gainera, taldea utzi duten kideei ere egin zieten omenaldia, hala nola Angela Ociori, Axier Gantzaraini, Maitane Goenagari eta Nerea Berasategiri. Bestalde, Azpeitian igeriketari eskainitakoagatik eta Izarraitz igeri elkarteari agertutako prestutasunagatik, Maixabel Azurmendik eta Aitor Berasategik ere jaso zuten aitortza. Gainera, Marea Urdina elkarteko Pablo Dominguezek eta Aritz Orbegozok Marea Urdina ziurtagiria eman zioten Izarraitz igeri elkarteari.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide