Abian da Erraiak proiektua diruz laguntzeko kanpaina. Gaur, ostirala, jarri dute martxan crowdfundinga, eta 40 egunez egin daiteke ekarpen ekonomikoa, honako loturan.
Joan den asteazkenean aurkeztu zuten Erraiak proiektuaren sortze prozesua Felipe Murillok eta diskoa osatzen lagundu dieten gainerako kideek Dinamoa Azpeitiko Sorgintza Gunean, hainbat herritarren aurrean. Erraiaken nondik norakoak azaldu ostean, gaur, ostirala, aterako dute argitara egindako lan guztiaren emaitza, Sanagustin kulturgunean eskainiko duten kontzertuan, 23:00etan hasita.
Diskoaren aurrerapen bezala, Hegaldiaren aurrean kantua jarri dute entzungai sarean, Badok.eus atarian.
Azpeitiko Udalak eta Kultur Mahaiak abian jarritako Sorkuntza Beka jaso zuen Felipe Murilloren Erraiak proiektuak. Danele Sarriugarte idazlearen izen bereko eleberriak inspiratu zuen azpeitiarraren lana.