Jagoba Beobideren Alaves Lehen Mailara igo da

Jagoba Beobide, Alaveseko azpeitiar jokalaria.

Gasteizko taldeak atzo ziurtatu zuen igoera, Mendizorrotzan Numanciari 2-0 irabazi ondoren. Azpeitiar jokalaria ordezkoen aulkitxoan egon zen, baina ez zuen jokatu.

Jagoba Beobidek (Azpeitia, 1987) laugarren denboraldia bete du Alavesen eta atzo, igandea, bigarren igoera ospatzeko modua izan zuen. Izan ere, Gasteizko taldeak 2016-2017 denboraldian Espainiako Lehen Mailan jokatzeko txartela eskuratu zuen Mendizorrotzan, Numanciari 2-0 irabazita. Deialdian sartu arren, atzoko neurketa jokatu gabe gelditu zen Beobide.

2012-2013an, azpeitiarrak taldean egin zuen lehen denboraldian, Bigarren B-tik Bigarren Mailara igo zen Alaves. Hiru urteren buruan, gorengo mailarako jauzia egin dute gasteiztarrek, Beobide tartean dela. Taldeak igotzeko zituen aukerez galdetuta, "hankak lurrean izan behar ditugu" eta "oso-oso zaila izango da, talde oso onak daudelako", zioen Jagoba Beobidek urtarrileko Uztarria aldizkarian egindako elkarrizketan.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide