Azpeitiarentzat Euskal Herriko Herriarteko txapela

Pilotariak sariak jasota. (Estitxu Elduaien)

Gaur, Santio Eguna, jokatu dute Azpeitiak eta Uharteko Euskal Herriko Herriarteko Txapelketako finala, Iruñeko Labrit pilotalekuan. 1 eta 2 nagusitu dira azpeitiarrak, eta Ilunpekoek bigarrenez jantzi dute Euskal Herriarteko txapela. 20:30ean Etxe Zuri tabernaren aurretik hasita, kalejira egingo dute Ilunpeko pilotariek. Ondoren, harrera egingo diete udaletxean.

Joan den uztailaren 5ean Gipuzkoako Herriarteko Txapelketa irabazi ostean, Euskal Herriko Herriarteko Txapelketako finalera iritsi eta txapela jantzi dute gaur, Santio Eguna, Azpeitiko pilotariek. Uharteren kontra jokatu dute finala, Iruñeko Labrit pilotalekuan, eta 1 eta 2 nagusitu dira Ilunpe pilota elkarteko pilotariak.

Jon Alberdi eta Mikel Unanue kadete azpeitiarrek jokatu dute aurreneko norgehiagoka, eta aise irabazi dute: 22 eta 1. Haien ostean Gorka Iriarte eta Julen Egiguren jubenilak kantxaratu dira, eta 8 eta 22 galdu dute neurketa. Hirugarren partida Daniel Murgiondok eta Jurgi Larrañagak jokatu dute eta 22 eta 16 nagusitu da bikote azpeitiarra.

20:30ean Etxe Zuri tabernaren aurretik hasita, kalejira egingo dute Ilunpeko pilotariek. Ondoren, udal ordezkariek harrera egingo diete txapeldunei, udaletxean.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide