Bihar eta etzi jarriko dituzte salgai zapatuan Azpeitiak eta Astigarragak Donostiako Atano III.a pilotalekuan jokatuko duten Gipuzkoako Herriarteko Pilota Txapelketaren finalerako txartelak. 18:00etatik 20:00etara bitartean eskuratu ahal izango dira sarrerak Izarraitz pilotalekuko leihatilan: kantxako sarrerak hamar euro ordaindu beharko dira, eta frontoiko goiko aldekoak bost euro.
Gainera, Ilunpe pilota elkarteak Azpeitia eta Donostia artean joan-etorria egiteko doako autobus zerbitzua eskainiko du, eta bidaiarako izena ere eman ahal izango da Izarraitzen. Finala 16:30ean hasiko da zapatuan, eta Donostiarako autobusa 15:00etan aterako da anbulatorioaren aurretik.