Borobila izan da asteburua Itziar Bastida eta Anaitz Lizartza dantzarieentzat. Dantza sueltoko bikoteak bi txapelketa jokatu eta biak irabazi ditu. Zapatuan, Errezilgo San Antonio festen barruan jokatu zuten VI. Dantza Suelto Txapelketa bereganatu zuten Azkoitiko Bizkargi musika eskolan Aitor Sorazu irakaslearekin aritzen diren diren urrestildarrak eta azpeitiarrak. Atzo, berriz, Leioako (Bizkaia) XVIII. Dantza Suelto Txapelketan lehiatu ziren, eta han ere garaipena eskuratu zuten.
Errezilgo txapelketan, Luis Alberdi Beltzaren eskolako June Elorza azpeitiarrarentzat eta Eneko Sarasua azkoitiarrarentzat izan zen bigarren tokia. Leioan, berriz, gazteena ez ezik, helduen txapelketa ere jokatu zuten, eta hor azpitxapeldun suertatu ziren Laura Bastida –Itziarren ahizpa– eta Ekain Uzkudun.