Lau hilabete igaro dira Hitza euskarazko egunkari lokalek eskualdeko webguneak (zazpi; Urola Kostakoak, besteak beste) berritu eta herrietakoak martxan jarri zituztenetik, betiere edizio jarraituari, blogei, bideoei, argazkiei eta herritarrek bidalitako informazioari garrantzia emanez.
Orain, edizio jarraituetako informazioa bateratu eta gaurtik aurrera www.hitza.info webgunea abiaraziko dute tokian tokiko prentsa sustatzeaz arduratzen den Euskarazko Komunikazio Taldearen (EKT) barneko Bertako Hedabideek. Gaur (asteazkena) aurkeztuko dute egitasmoa, 19:00etan, Donostian, Doka kafe antzokian Antigua auzoan.
Helburua
Euskarazko herri informazioaren atari garrantzitsuena bihurtzea da asmoa.
Herri web askotako informazioa
- Hitzetako 102 herrietako informazioa bilduko dute (uztarria.com-ekoa, besteak beste; Urola Kostako Hitza-ko bazkideetakoa da Uztarria Komunikazio Taldea): Tolosaldekoak eta Leitzaldekoak, Urola Kostakoak, Donostiakoak, Lea-Artibaikoak eta Mutrikukoak, Busturialdekoak, Goierrikoak eta Oarsoaldekoak.
- Herri informazioaren inguruan lanean ari diren beste hainbat agerkari digitalen edukiak eta albisteak ere bilduko dituzte. Izan ere, Uribe Kostako herrietako, Hernaniko (Gipuzkoa), Arrigorriagako (Bizkaia), Baztan eta Bortzirietako, Bidasoako, Iruñerriko eta beste hainbat herri eta eskualdetako informazioa ere izango da webgune berrian, Ttipi-Ttapa, Hernaniko Kronika, Bidasoa Media, Arrigorriagan Euskaraz, Nabarreria eta beste hainbat komunikabiderekin abiarazitako elkarlanari esker.
Bideoak Euskaltube-n
Webgunearen ezaugarri nagusietako bat bateko eta besteko albisteak bilduko dituen edizio jarraitua izango denez, arduradunek garrantzia eman nahi diote gertaeren argazkiak eta bideoak erakusteari. Bideoei dagokienez, aurrerantzean Euskaltube izango da Hitzen webguneek bideoak jartzeko hautatuko duten webgunea, eta Euskaltuben bertan kanal berezia izango da Hitzen bideo horiek ikusi ahal izateko.
Irakurle gehiago
Gaur egun, zazpi Hitza-k 102 herritara iristen dira, eta guztien artean egunero 40.000 ale inguru argitaratzen diuzte. Orain, webgune berriak papereko edizioa PDFan ikusteko edo hartzeko eskainiko duen aukerarekin, beste milaka irakurle izango dituzte. Batez beste, zazpi webguneen artean 14.000 bat irakurle aitortzen dituzte egunero bisitari kopurua zehazten duten Interneteko zenbatzaileek.
Lan teknikoa, Ehuntzen-ek
EKTko Ehuntzen Internet enpresak egin du www.hitza.info-ren lan teknikoa. Berria.info daraman enpresa da Ehuntzen.
Ikusi Iban Arregi (Azpeitia) Bertako Hedabideetako zuzendariari egindako elkarrizketa