Gustura ari naiz zahartzen eta ez dut zaharkitzeko asmorik. Atzera sarri begiratzen dut, baina onena etortzear dela seguru nago. Denboraren makinan atzera begiratzea erraza da, bizitakoa gogoratzea besterik ez. Ariketa zaila denboraren makinan aurrera egitea da. Esaterako, nola irudikatzen duzu 30 urte barruko gure Azpeitia maitea. Ez da erraza. Mojarik geldituko ote da? Igandeko meza nork emango du? Txikiteoa tabernaz taberna ala whatsapez? Azketako iturrira oinez ala igogailuan? Uztarria, paperean ala erabat digitala? Basilikan inor ezkonduko al da? Ordurako emakumeren bat herriko alkate bai? Xubik, dena agintzeaz gain, zer kargu izango du Iraurgin? Denbora tarte horretan Aranburuk ordezkorik izango al du Realean?
Galdera ugari eta erantzun errazik ez. Tratu bat egingo dugu. 2045eko Uztarriaren apirileko alean, galdera guztiei emango diet erantzuna eta zuk irakurri. Ados? Hitza eman didazu, beraz, hutsik ez egin.