Urtero legez, aurten ere antolatu du Lagun Onak Mendi Bazkunak herritarrentzako irteerarik kuttunenetakoa: uztailean, hilaren 9an eta 10ean, Europako Mendietara joango dira.
Larunbatean aterata, bi ibilbide egin ahal izango dituzte mendizaleek: bata gogorra, Sotresetik Fuente Deko kablera Vega de Urriellu eta Horcados Rojoseko lepotik barrena (20 kilometro eta 1.800 metroko malda positiboa); eta errazagoa, hasiera eta amaiera bera dituena eta ibilbidea Duje bailaratik egingo dena, Alivako aterpetik pasatuta (13 kilometro eta 1.000 metroko malda positiboa).
Larunbatean 04:00etan aterako da autobusa anbulatorioaren aurretik. Larunbatean egingo dituzte txangoak, eta horiek bukatzean Potesera (Kantabria) itzuliko dira autobusez. Igandean beste ibilaldi bat egingo dute: Cruz de la Viornara (1.151 metro) joango dira. Azpeitira itzultzeko autobusa 12:00etan abiatuko da Potesetik, eta bidean bazkalduko dute.
30 lagunek parte hartu ahal izango dute txangoan, eta dagoeneko zabalik da izena emateko epea Lagun Onak Mendi Bazkunaren webgunean; uztailaren 7ko 21:00etara arte egongo da horretarako aukera. Bazkideek 60 euro ordaindu beharko dute, langabetuek eta ikasleek 45 euro, eta gainerakoek 70 euro. Zenbateko horretan sartzen dira joan-etorriko autobusa, Poteseko albergean gaua igarotzea, afaria eta igandeko gosaria.