Udaberriko Mendi Astea bukatzeko, Reel Rock 16 zinema jaialdiko ikus-entzunezkoen emanaldia izango da datorren ostegunean, hilak 26, Soreasu antzokian. Lehen aldiz izango dira egitasmo horretako filmak ikusgai Azpeitian.
Hain zuzen ere, Bridge Boys (fisuren eskalada beste maila batera eramanda), Big Things to Come (Alex Johnson eliteko eskalatzailearen hamarkada luzeko bidaia), Barefoot Charles (kobazulotan bizi den opera abeslari eta eskalatzailea) eta Cuddle (munduko eskalatzaile onenak Alpeetako pareta latzenen kontra) abenturazko lanak ikusteko parada izango da. Emanaldirako sarrerak salgai daude dagoeneko Kulturazen webgunean, 5,5 euroren trukean.