Hasi dira ur irekitako zitak Izarraitzeko master proiektuko igerilarientzat

Erabiltzailearen aurpegia
Master mailako hainbat igerilari. (Izarraitz igeri elkartea)

Joan zen igandean MDK Swim Bermeo proban parte hartu zuten hainbat igerilarik. Aipatzekoa da Leire Kerexeta eta Julen Agirrezabalaga lehen 35 igerilarien artean sailkatu izana.

Izarraitz igeri elkartearen master proiektuko igerilariek ekin diote ur irekietako denboraldiari. Hain zuzen ere, joan zen igandean MDK Swim Bermeo proban parte hartu zuten Leire Kerexetak, Ainhoa Olazabalek, Julen Agirrezabalagak, Martin Altunak, Xabier Aranburuk, Ander Beobidek, Arkaitz Elorzak, Jon Larrañagak eta Asier Otaegik.

Bermeo eta Mundaka artean 2.500 metroko itsas zeharkaldia egin zuten, neoprenodun modalitatean. Azpimarratzekoa izan zen Kerexeta eta Agirrezabalaga –laugarren sailkatu zen gizonetan– sailkapeneko lehen 35 igerilarien artean sartu izana.

Hurrengo zita ere ez dute makala master mailako igerilariek. Izan ere, Gipuzkoako Ur Irekietako Liga hasterako, Kantabriara joango dira Xabier Aranburu eta Julen Esteban. Horiek Izarraitz ordezkatuko dute Soplaoman datorren igandean egingo duten 10.000 metroko proban.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide