Hemen da beste urte batez Azpeitiko Gaztetxeak antolatutako Garagardo Festa. Aurten bi egunez izango da zabalik. Ostegunean eta ostiralean Gaztetxeko ateak irekita izango dira 19:00etatik aurrera, garagardo ederraz gozatzeko.
Aurten, garagardo artisaua izango da protagonista, eta honako garagardo hauek dastatzeko aukera izango dute Gaztetxera hurbiltzen diren lagunek: Saltus Anabasa, Otsaihen, Mitika Lamia, Arbaso gorria; Arbaso horia, Barce Loka eta etxeko garagardoa.
Prezioa garagardoaren araberakoa izango da. Dena den, bi euro eta erditik hiru euro bitartera arteko prezioa izango dute denek. Arrakasta izaten ari den etxeko garagardoa 2,5 euroren truke dastatu ahal izango dute hala nahi duten lagunek.
Sabelak betetzeko jatekorik ere ez da faltako. Ostegunean ogitartekoak eta plater konbinatuak prestatuko dituzte Gaztetxeko kideek. Ostiralean, berriz, janari mexikarra izango da afaltzeko. Begetarianoentzako jatekoa ere ez da faltako ostegunean zein ostiralean. Plateren zein ogitartekoen prezioak pertsona bakoitzak eskatzen dituen osagaien araberakoa izango da.
Giroa pixka bat gehiago berotzeko, kontzertu akustikoa eta jolasak antolatu ditu Gaztetxeak. Ostegunean, 22:00etan hasita, The Oiers taldearen kontzertu akustikoa izango da. Ondarroatik etorriko dira bi lagun handi, kresalezko doinuekin gaua goxatzera. Ostiralean, aldiz, jolasak izango dira nahi duen ororentzat. Besteak beste, futbolin, dardo eta karta txapelketak antolatuko dira parte hartu nahi duenarentzat.