Errimeren agurrak eta Anariren doinuek sorgindutako ostirala

Erabiltzailearen aurpegia

Ostiral berezia izan zen joan zen astekoa Azpeitiko Gaztetxean. Berezia bezain ederra. Izan ere, oholtza elkarbanatu zuten Errime eta Anari taldeek bertaratu ziren 300 lagunen gozamenerako.

Errime izan zen oholtzara igotzen aurrena, azken zuzenekoa emateko. Ohi bezala, entzuleen belarriak asetu zituzten beren doinuekin eta abestietako mezu ezkutuekin. Aurreneko maketarako sortu zituzten abestiak ez ezik beste artista batzuenak eskaini zituzten ordubete inguru iraun zuen kontzertuan. Taldea sortu eta orduz geroztik Bidelagun izan dituztenei eskerrak emanez agurtu zuten beren jarduna Azpeitiko eta Zarauzko musikari-sortzaileek, entzuleen txalo zaparrada artean. Ondoren, Anarik eta bere taldeak hartu zuten Gaztetxeko oholtza handia, eta haien abestietan barna murgildu ziren hitzordura bertaratu ziren lagunak. 

Duela bi urte hasi zen Errimeren hegaldia. Jon Gurrutxaga, Unai Martinez, Felipe Murillo eta Asier Aizpuru azpeitiarrek eta Paul Beitia eta Patxi Gabilondo zarauztarrek sortu zuten proiektua. Sorkuntza Bekari esker aurreneko maketa kaleratzea lortu zuten 2016ko urrian. Lehen kontzertua, aldiz, 2017ko martxoan eskaini zuten, Sanagustin kulturgunean. Orduko hartan Ruper Ordorikarekin elkarbanatu zuten kartela. Aurreneko zuzenekoaren ostean beste hainbat eman dituzte Euskal Herriko zenbait txokotan. Gaztetxean amaitu du Errimek gazte sorkuntzatik abiatutako ibilbidea, baina Gurrutxagak joan zen ostiralean esan zuen moduan, ezin jakin etorkizunean zer gertatuko den. 

Azpeitiko Gaztetxeak eskerrak eman nahi dizkie Errimeko kide guztiei agurreko kontzertua etxean emateagatik. Gaztetxea zuen etxea ere bada!

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide