Ezkutuko piztiak hamalau

Erabiltzailearen aurpegia da hau Enok | Iritzia
2020ko mar. 11a, 13:09

Gerturatu eta lau. Halaxe dio komunitateko erabiltzaile berri batek atari honetan. Badirudi Koronabirusa baino azkarrago zabaltzen ari dela notizia bakoitzaren azpian iruzkinak idaztea edota hobeto esanda, "troleatzea".

Askotarikoak dira eta izan dira trollak sarean, txiolari famatuak han eta hemen, Osaba Sabin @aranagoiri edota bertso-troll @PatxiBakallo esaterako. "Iritzi publikoaren izar anonimo" modura definitzen zituen 'Argia' aldizkariak artikulu batean troll hauek.

Urrutira joan gabe, gurean ere baditugu trollak. Batzuk umoretik eta beste batzuk anonimotasunak eman dezakeen indarretik eta ausardiatik komunitateko erabiltzaile orori (adierazpen askatasunaren izenean) bere iritzia emateko aukera aprobetxatuta. Hala ere, ez nuke Uztarriako moderatzaileen paperean jarri nahiko egoera hauek kudeatzeko momentuan.

Ez noa erabat subjektiboa den troll zerrenda bat plazaratzera, bakoitzak jakingo du zer intentziorekin idazten duen atari honetan. Beti gustatu izan zait iruzkinak irakurtzea, herritarrek parte hartzea, herriko gertakariei termometroa hartzea. Baina badaukat sentipen bat: iritzi sanoak, kritikoak eta eraikitzaileak gutxitzen ari direla, eta lehenago edo geroago neurriak hartu beharko direla.

Martxoko Uztarriaren zenbakian gai honen inguruko hausnarketa bat egiteko gonbita luzatu nahi izan da irudi honekin.

Bidali:  

Erantzunak

Erabiltzailearen aurpegia da hau Maite Garmendia | 2020-03-11 : 15:53

Erreza da gero kristorenak eta bi esatea bai taberna batean tragoa eskutan duzunean, bai gaitzizen xelebre batean ezkutatzen zarenean ere.
"Adierazpen askatasuna" omen dugun garaian, zergatik ezkutatu? Zer arrazoi daude hori egiteko herri honetan?
Ah, bai, sokamuturraren gaia. Gai tabua. Ikutu ezina, eztabaidaezina.
Herriaren "gehiengoa" alde egonik,zergatik ez aurpegia eman eta defendatu? Zeren beldur gaude erraietatik defendatzen dugun horren alde egiteko gehien gehienak gurekin badaude?
Berrogeita hamar kilo inguru dituen sokarekin lotuta dagoen animalia horren aurrean ehundaka lagun jartzeak ematen duen adrenalinarik sortzen ez duelako?
Neu ere sokamuturrean ibilitakoa naiz, urrutian edo karreretan gora ta behera, eta bizi izan dut adrenalina azpeitiar hori.
Asko bizi eta pentsatu eta gero beste era batera ikusten ditut gauzak. Eta festak "gozatzeko" inork ez duela zertan sufritu pentsatzen dut. Festa eredu hori ez da nirea eta inolako lotsarik ez dut hori esateko.
Nik defendituko dudan jai eredua ez da hau.
"Gutxi" izango garela festa eredu "tradizionalista" hau aldatu nahiko genukeenak?
Aldaketa handiak, jende talde txikiak izaten dituzte beren hastapenetan.
Nik hala pentsatzen dut eta hala adierazten dut.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu