Ro taldeak Donostiako Musika Dokumentalen Jaialdian parte hartuko du

Erabiltzailearen aurpegia

Donostiako XIII. Musika Dokumentalen Jaialdian parte hartuko du Azpeitiko eta Azkoitiko musikariek osatutako Ro taldeak. Zapatuan, urtarrilak 11, Umbral filmaren emanaldian lan horren musika banda zuzenean joko dute Ro taldeak eta Sara Zozayak. 25 minutukoa da Arnau Padillak ekoiztutako Umbral filma, eta 17:00etan emango dute musika eta irudia uztartuko dituen saioa Tabakalerako zinema aretoan. Hala irakur daiteke jaialdiaren webgunean: "Ez film emanaldia, ez kontzertua. Ro eta Sara Zozaya taldeek emanaldi berezia aurkeztuko dute Arnau Padillarekin zinemagilearekin batera".

2018an sortu zuten Ro musika taldea Azkoitiko Matadeixen. Ordutik hainbat lan kaleratu dute, baita hainbat kontzertu eskaini ere. Iker Amenabar –baxua– azpeitiarrak eta Gorka Alcalde -gitarra-, Josu Usobiaga –bateria–, Iñigo Gonzalez –gitarra– eta Mikel Iraeta –sintetizatzailea/teklatua– azkoitiarrek osatzen dute Ro.

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide