Euskalmet Euskal Meteorologia Agentziak 2018ko datu esanguratsu batzuk argitaratu ditu Twitterren. Agentziak Araban, Bizkaian eta Gipuzkoan dituen neurgailuen bidez jasotako muturreko datuak plazaratu ditu, eta datuotako bat Azpeitian neurtutakoa da; hain zuzen ere, 2018ko tenperatura altuena Nuarbeko Ibai-Eder urtegian neurtu zuen Euskalmetek. Agentziak jakinarazi duenez, abuztuaren 6an, astelehena, 39,4 gradu neurtu zituen termometroak.
Euskalmetek iaz jasotako tenperatura baxuena, berriz, Iturrietan (Araba) izan zen; joan zen urtarrilaren 9an -12,4 gradu neurtu zituen termometroak. Prezipitazio gehien egin zuen egunaren eta tokiaren berri ere eman du agentziak; apirilaren 11n, 169,3 litro euri egin zuen metro karratuko Bidanian. Haize-bolada indartsuena (149,8 kilometro orduko) Urduñan neurtu zuen martxoaren 11n.