Laboaldia dator Azpeitira

Erabiltzailearen aurpegia da hau Kulturaz kooperatiba | Kultura
2018ko aza. 9a, 17:15

Mikel Laboaren heriotzaren hamargarren urteurrenaren bueltan, Donostiako artistaren unibertso poetiko oparoa erakusteko egitaraua osatu dute Azpeitiko Kultur Mahaiak eta Kulturaz kooperatibak, beste hainbat eragilerekin elkarlanean. Azaroaren 21etik abenduaren 2ra, erakusketa bat, hitzaldiak, mural margoketa eta kontzertuak izango dira, besteak beste, herrian.

Hau da Enok Sudupek Laboaldia iragartzeko egin duen kartela.  Ikusi haundiago | Argazki originala

Abenduaren 1a egun berezia da euskaldunarentzat 2008az geroztik: Mikel Laboa hil zen, eta denok sentitu ginen umezurtz. Ruper Ordorikak kantua egin zion: Egun da abenduaren lehena / 2008kua / Gauza ttikien erresumatik / partitu da maisua.

Lorea Agirrek idatzi zuen Berrian: "Gazteek berekiko begirune berezia izan dute beti. Txerokiak etorri ziren lehenengo. Pena bat aitortu zuen: lehen omenezko disko hartako musikari gazteekin afari bat egin ez izana. Musikari gazteagoenganako begirunea berak ere, zubi bat luzatuz: 'Etorkizuna gazteen esku dago, eta nik egindakoak zerbait esaten badie, edo nire musika zerbaitetarako baliagarri bazaie, bada hori pozgarria da niretzat'".

Txinaurriak etorri ziren gero. Eta etorriko dira txeroki eta txinaurri gehiago, horretarako ari gara lanean, horretarako antolatu dugu Laboaldia Azpeitiko Kultur Mahaiak eta Kulturaz kooperatibak, beste hainbat eragilerekin elkarlanean.

Mikel Laboaren unibertso poetikoa bere osotasunean erakustea da gure asmoa, baina ez omenaldia egiteko bakarrik, ez bere lanaren alderdi guztiak ezagutzera emateko soilik, baizik eta sortzaile berriei ateak irekitzeko, sortzeko grina kutsatzeko, mundua nork bere erara eman dezan laguntzeko.

Mikel Laboaren lanak ahotsa eta kantua ditu ardatz, edozein herri kantak bezalaxe, eta gitarra biluzi bat. Bere lanak, ordea, beste mundu asko biltzen ditu bere baitan: bere garaiko hainbat poetaren hitzak hartu zituen kanturako, Zumeta pintorearen lana hautatu irudia jartzeko, beste hainbat musikarirekin aritu zen lanean...

Egitaraua

Mikel Laboaren unibertso poetiko oparoa erakusteko egitarau hauxe prestatu dugu:

Azaroaren 21etik abenduaren 2ra

  • Erakusketa: Laboa gertutik. 18:00etatik 20:00etara, Betharrameko Udal Erakusketa Aretoan.

Azaroaren 23a, ostirala

  • Aurkezpena: Laboaren begiak liburuxka, Alaitz Aizpuru egilearekin. 18:00etan, Udal Liburutegian.

Azaroaren 24a, zapatua

  • Mural margoketa. Egunean zehar, Alde Zaharrean.

Azaroaren 27a, asteartea

  • Hitzaldia: Laboaren kateak: iragana eta oraina, zilbor-heste. Ana Gandararekin. 19:00etan, Sanagustin kulturgunean.

Azaroaren 28a, asteazkena

  • Bisita gidatua eta hitzaldia: Non dago Mikel Laboa? Josune Albisurekin. 19:00etan, Betharrameko Udal Erakusketa Aretoan.

Azaroaren 30a, ostirala

  • Zumetarenera txangoa, arratsaldez.
  • Solasaldia eta entzunaldia: Laboaren belarria, Ibon RGrekin. 21:30ean, Gaztetxean.

Abenduaren 1a, larunbata

  • Kontzertua: Laboa hamaika ahotsetara, herriko musikarien eskutik. 22:30ean, Sanagustin kulturgunean.
Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu