Testigantza bilketa egin eta jazarpen polizialei erantzuteko aholkularitza, martxan

Erabiltzailearen aurpegia da hau Krisiaren Seme-alabak Sare Sozialista | Gizartea
2020ko api. 10a, 14:15

Krisiaren Seme-alabak sare sozialistako kideok 'Antolakuntzari salbuespenik ez!' dinamikari ekin genion duela bi aste inguru, GKSk Euskal Herrian abiatutako 'Burgesiaren ofentsiba gelditu!' kanpaina politikoarekin bat eginez. Orain, pauso berriak ematera goaz, eta eskualdean, Azpeitian, Azkoitian eta Zestoan, hasiko gara erremintak antolatzen.

Dinamikaren aurkezpenean jakinarazi bezala, testigantza bilketa jarri dugu martxan. Datozen asteetan ere testigantzak jasotzen jarraituko dugu, baina era berean, beste lan ildo bati helduko diogu. Garai latzak ari gara bizitzen, eta are latzagoak izango dira etorriko direnak. Beraz, aurrerantzean defentsarako baliabideak herritarren eskura jartzeko ahalegina egingo dugu. Horretarako, oraingoz, jazarpen polizialei erantzuteko aholkularitza juridikoa eskainiko dugu.

Egoera proletarizatuenean edo latzenean dagoen jendearen testigantzak jaso nahi ditugu. Oraingoz, testigantzen bitartez informazioa bildu eta herriko argazki orokor bat egitea da gure asmoa, eta horrekin interbentzio formak hausnartu edota kasu ezberdinak publikoki salatzea. Horretarako, lan-arloari, etxebizitzari, indarkeria matxistari edota kontrol sozialari lotuta, salbuespen egoerak kolpatutakoen bizipenak jasotzea nahi dugu.

-Testigantzak

1| Egungo egoeran lanaren gaineko esplotazioaren intentsifikazioa nola ematen den ikus dezakegu, izan osasun arloko langileengan, izan bizitzeko beharrezko materialak saltzen diren guneetan… Horri lotuta, lanbide horietan osasun irizpideak bete gabe lanean diharduten beharginen edo lanaren gaineko esplotazio baldintzak areagotu zaizkien pertsonen (plantilla berarekin ordu gehiago, plantilla murrizketak…) berri izatea nahiko genuke.

2| Osasunari lehentasuna ematen omen dioten garaiotan, industria zein sektore ezberdinetako langileen osasun irizpideen gainetik kapitalaren etekin beharra jartzen da. Ekoizpena ez denez guztiz eten, lanera joatera behartuak ere ugari dira; egoera zaurgarrian dagoen jendea are egoera arriskutsuagoan uzten du horrek. Zentzu horretan, laneko geldialdia eskatu eta mehatxatu dituzten langileen testigantzak edo osasun eta segurtasun irizpiderik gabe lanean dabiltzan pertsonen testigantzak jaso nahi ditugu.

3| Erakundeek martxan jarri dituzten neurriek ez dute inondik inora balio kontraturik gabe lanean dabiltzan langileentzat, kaleratze irregularra jasan duten langileentzat edota bestelako batzuentzat. Beraz, langile ordezkaririk gabe lanean dabiltzanak edota kontraturik gabe lanean zebiltzanak (tabernetako zerbitzariak, kale saltzaileak, banatzaileak…) bizi duten egoera zein den ere jaso nahi dugu.

4| Konfinamendu egoerak dakarren indarkeria matxista arriskua eta horri aurre egiteko oztopo eta zailtasunak emakume asko babesgabe egotera kondenatzen ditu: egunerokoan haien erasotzailearekin egotera behartzen ditu, hortik ateratzeko inolako erremintarik gabe. Indarkeria jasaten ari diren emakumeen testigantzak ere jaso nahi ditugu.

5| Badira lanpostutik kaleratu dituztelako diru sarrerarik gabe gelditu direnak eta alokairua eta oinarrizko gastuak (ura, gasa, argia…) berdin-berdin ordaindu behar dituztenak ere. Kasu horiek jasaten dituztenen berri izan nahi dugu.

6| Isunak edota gehiegikeria polizialak jasan dituztenen testigantzak ere batu nahi ditugu.

-Aholkularitza juridikoa

Bestetik, gaur egungo alarma egoerak ekarri duen salbuespen egoera politikoa dela eta, jendartearen oinarrizko eskubideak ezabatu eta polizia abusuak hazi egin dira. Bide horretan, beharrezkoa ikusten dugu testigantzak jasotzeaz gain, babesgabeen dagoen eta polizia jazarpena jasan duen jendea babeserako erremintaz hornitzea. Gauzak horrela, ondorengo kasuetan aholkularitza eskaintzen hasiko gara:

1- Osasun beharrak bultzatuta kalera atera eta poliziak jazarri duen jendea.
2- Kolektibo zaurgarriei laguntzeko kalera atera eta poliziak jazarri duen jendea.
3- Kolektibo zaurgarrien babesa antolatzeko kalera atera eta jazarpena jasan duen jendea.


Testigantzak bidaltzeko nahiz aholkularitza jasotzeko, 608 44 89 79 telefonora deitu edo 'krisiarentestigantzak@gmail.com' helbidera idatz dezakete herritarrek.

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu