Ura

Erabiltzailearen aurpegia da hau Aitziber Aizpuru | Iritzia
2016ko abu. 30a, 09:17

Udan gehiago izerditzen gara, tenperaturak gora egiten duelako; beraz, gure behar hidrikoak handiagoak izaten dira. Egarria sentitzen dugu behar horiek bete ahal izateko, baina orokorrean, arreta txikia ematen diogu edaten dugun horri. 

Gauzak asko aldatu dira azken urteotan, edateko ohiturei dagokionez. Freskagarrien kontsumoa asko gehitu da, gaztetxoetan, batik bat. Azukre eta kilokaloria ugari izateaz gain, egarria areagotzen dute. 

Azken azterketen arabera, ikertutako biztanleriaren erdiek ez zituzten betetzen EFSAren (European Food Safety Authority) gomendioak, fluidoen kontsumoari dagokionez. Beraz, oso garrantzitsua da uraren kontsumoa bultzatzea behar hidrikoak bete ahal izateko (kilokaloria kopurua igo gabe). Ura elikagai bat gehiago da; gorputzarentzat beharrezkoa. 

Ohitura onak txikitatik hartzea hobea da, beti garaiz egon arren. Erakutsi diezaiogun gure umeei geu eredu izanez. Ura da aukera onena hidratatzeko eta egarria asetzeko. Freskagarriak (gasdunak edo gasik gabeak) ez daitezela uraren ordezko bihurtu, une jakinetan hartzeko bakarrik, baizik. Bai neguan, bai udan, ura barra-barra edan!

(Abuztuko Uztarria aldizkarian argitaratutako iritzi artikulua da honakoa).

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu